दक्षिण अफ्रिकाले इजरायलले गाजामा ‘नरसंहार’ गरेको आरोप लगाउँदै अन्तर्राष्ट्रिय अदालत (आईसीजे)मा मुद्दा दायर गरेको छ । आईसीजेले ‘जेनोसाइड कन्भेन्सन’ अन्तर्गत इजरायलको दायित्वको कथित उल्लंघनसँग सम्बन्धित मुद्दा दायर गरेको पुष्टि गरेको हो ।
तर, इजरायलले यो आरोपलाई ‘निराधार’ भन्दै कडाइका साथ अस्वीकार गरेको छ । इजरायलको विदेश मन्त्रालयले दक्षिण अफ्रिकाले लगाएको यो आरोपलाई इजरायलले अस्वीकार गरेको जनाएको छ ।
नेदरल्याण्डको द हेगमा रहेको आईसीजे संयुक्त राष्ट्र संघको प्रमुख कानुनी निकाय हो । यसले विभिन्न देशहरू बीचको विवादहरू समाधान गर्दछ र अन्तर्राष्ट्रिय कानुनी मुद्दाहरूमा सल्लाह दिन्छ ।
आईसीजेमा अपील दायर गरेपछि, दक्षिण अफ्रिकाले एक विज्ञप्तिमा आफ्नो देश नरसंहार हुनबाट रोक्न बाध्य बनेको बताएको छ । विज्ञप्तिमा भनिएको छ, ‘दक्षिण अफ्रिका गाजा पट्टीमा इजरायलको आक्रमण र त्यहाँका बासिन्दाहरूलाई जबरजस्ती हटाइएका कारण नागरिकहरूको दुर्दशाबाट चिन्तित छ ।’
‘यसबाहेक त्यहाँ मानवता विरुद्धको अपराध र युद्ध अपराध जस्ता अन्तर्राष्ट्रिय अपराधहरूका साथै नरसंहार वा यस्तै अपराधहरूको रिपोर्टहरू छन्,’ विज्ञप्तिमा भनिएको छ ।
आफ्नो आवेदनमा दक्षिण अफ्रिकाले आईसीजेलाई अर्को हप्ता सुनुवाइ गर्न माग गरेको छ । इजरायली विदेश मन्त्रालयका प्रवक्ता लियोर हयातले दक्षिण अफ्रिकाको दाबीलाई अदालतको घृणित र अपमानजनक शोषण भएको बताएका छन् ।
