काठमाडौं । नेकपा माओवादी केन्द्र राष्ट्रियसभामा पहिलो दल बनेको छ । फागुन २० गते २० सांसदको पदावधि सकिनुअगावै बिहीबार निर्वाचन सम्पन्न भएको छ । निर्वाचनमा २० मध्ये १९ सीटमा निर्वाचित भएका छन् ।
यो निर्वाचनको नतिजासँगै फागुन २० गतेपछि राष्ट्रियसभामा दलीय हैसियतमा माओवादी पहिलो दल बन्ने छ भने अहिले पहिलो दल रहेको नेकपा एमाले तेस्रोमा खुम्चिने भएको छ । प्रतिनिधिसभामा ३२ सीटसहित तेस्रो स्थानमा रहेको माओवादी केन्द्र राष्ट्रियसभामा भने पहिलो दल बन्ने भएको हो । अहिले राष्ट्रियसभा माओवादी दोस्रो स्थानमा रहेको छ ।
यस्तै, नेपाली कांग्रेस दोस्रो स्थानमा आएको भने नेकपा एकीकृत समाजवादी ८ सांसदसहित चौथो स्थानमा छ । बिहीबार सम्पन्न निर्वाचनमा कांग्रेसले १०, माओवादीले ५, नेकपा एकीकृत समाजवादीले २ र एमाले तथा जसपाले एक–एक सीट जितेका छन् ।
कोशीमा एमाले–राप्रपा गठबन्धन एक सीट जित्न सफल भएको छ । गठबन्धनबाट फ्लोर क्रस भएपछि एमालेकी रुक्मिणी कोइरालाले अनपेक्षित जीत हात पारेकी छन् । कोइरालाले सत्ता गठबन्धनका उम्मेदवार चम्पादेवी कार्कीलाई पराजित गरेकी हुन् । उनी माओवादीबाट उम्मेदवार थिइन् ।
यस्तै, कांग्रेसबाट कृष्णप्रसाद सिटौला, आनन्द ढुङ्गाना, जीतजंग बस्नेत, विष्णुकुमारी पुडासैनी, किरणबाबु श्रेष्ठ, पदमबहादुर परियार, विष्णुकुमारी सापकोटा, कृष्णबहादुर रोकाया, बलदेव बोहरा र नारायणदत्त भट्ट राष्ट्रियसभामा चुनिएर आएका छन् ।
यस्तै, माओवादीबाट श्रीकृष्ण अधिकारी, मनरूपा शर्मा, झक्कु सुवेदी, विष्णु विश्वकर्मा र रेणु चन्द राष्ट्रियसभामा आएका छन् ।
नेकपा एकीकृत समाजवादीबाट घनश्याम रिजाल विश्वकर्मा र सावित्री मल्ल, जसपाबाट पूजा चौधरी निर्वाचित भएर राष्ट्रियसभामा आएका छन् ।
अहिले राष्ट्रियसभामा १८ सांसद छन् । जसमा एमालेका ९ सांसद बिदा हुँदैछन् । कांग्रेसका ४, माओवादीका ३, एकीकृत समाजवादीका २, जसपाको एक र एक स्वतन्त्र सांसदको पदावधि सकिँदैछ । मन्त्रिपरिषद्को सिफारिसमा राष्ट्रपतिले मनोनीत गर्ने एक सीटमा जनमोर्चाकी दुर्गा पौडेललाई ल्याउने सहमति गठबन्धनमा भइसकेको छ ।
एमालेबाट राष्ट्रियसभा अध्यक्ष गणेशप्रसाद तिमिल्सिनासहित विमला राई पौड्याल (मनोनीत), भैरवसुन्दर श्रेष्ठ, कुमार दसौंदी, दीपा गुरुङ, दिलकुमारी रावल थापा, ईन्दु कडरिया, नरपति लुहार र रामचन्द्र राई बिदा हुँदैछन् ।
राष्ट्रियसभामा हाल नेकपा माओवादीका १६ सांसद छन् । तीन सांसद बिदा हुँदा ५ सांसद निर्वाचित भएपछि अब १८ सीट बनाएर माओवादी पहिलो दल बनेको हो । १० सांसद रहेको कांग्रेसको चार बिदा हुँदा १० थपिएर १६ जना पुगेको छ ।
एकीकृत समाजवादीका अहिले आठ सांसद छन् । तर, दुईजना बिदा भएपनि गठबन्धनको बलमा दुई जना जित्न सफल भएको छ ।
यस्तै, जसपाका तीन सांसद छन् । एक रिक्त हुने स्थितिमा उसले एक जना यथावत राख्न सफल भएको छ । हाल राष्ट्रियसभामा जनमोर्चाको एक सांसद छन् । राष्ट्रपतिबाट मनोनीत भएर आउँदा २ जना हुनेछन् । एमालेका पूर्वनेता वामदेव गौतम राष्ट्रियसभामा अहिले स्वतन्त्रको हैसियतमा छन् । स्वतन्त्र रहेका गौतमले एमालेलाई साथ दिए सांसद संख्या ११ पुग्नेछ ।
फागुन २० गतेबाट कांग्रेसका रमेशजंग रायमाझी, अनिता देवकोटा, प्रकाश पन्थ र जीतेन्द्रनारायण देव, माओवादीबाट महेशकुमार महरा, हरिराम चौधरी र वीना पोखरेल, नेकपा एसबाट सिंहबहादुर विश्वकर्मा र नन्दा चपाईं तथा जसपाबाट प्रमिलाकुमारी यादव र नेकपा एसबाट गठबन्धनको सहयोगमा निर्वाचित भएका स्वतन्त्र सांसद खिमलाल देवकोटा बिदा हुँदैछन् ।
