काठमाडौं । नयाँ संविधान जारी भएपछि नै सरकारका अंगहरु चलायमान बनाउन लागि नयाँ ऐन कानुन बनाउनु पर्ने थियो । कतिपय महत्वपूर्ण ऐन कानुन बनेर लागु भैसकेका छन् । भर्खरै निजामती ऐन पनि संसदमा दर्ता भएको छ । तर सुरक्षा निकायको महत्वपूर्ण अंग मानिएको नेपाल प्रहरी ऐन अहिलेसम्म संसदमा पुग्न सकेको छैन । ऐन ल्याउने भन्दा भन्दै एक दर्जन गृहमन्त्रीहरु बनिसक्दा पनि ऐनको मस्यौदा अहिलेसम्म गृहमन्त्रालय–कानुन मन्त्रालय र अर्थमन्त्रालय गर्दै थन्केको छ । संसदमा तत्कालै दर्ता हुने अवस्थामा छैन ।
जसका कारण सरकारले नेपाल प्रहरी ऐन २०१२ प्रतिस्थापन नगर्दै माथिल्लो तहका प्रहरी अधिकारीहरु घर जान लागेका छन् । उमेरहदका कारण उनीहरु अनिवार्य अवकाशका जान लागेका हुन् ।
नेपाल प्रहरीका अतिरिक्त महानिरीक्षक (एआईजी)द्वय सन्दीप भण्डारी र मिरा चौधरी अबको वैशाखको पहिलो साता संगठनबाट विदा हुँदैछन् । उनीहरु एआईजीको उमेरहदका कारण अनिवार्य अवकाशमा जान लागेका हुन् । २०५१ चैत ५ गतेदेखि प्रहरी निरीक्षक पदबाट प्रहरी सेवा सुरु गरेका भण्डारी र चौधरी एकसाथ अवकाशमा जान लागेका हुन् ।
वैशाख ५ र ७ गते एआईजीको ५६ वर्षे उमेरहदका कारण अवकाशमा जान लागेको प्रहरी प्रधानकार्यालयले जनाएको छ । प्रहरी नियमावली अनुसार एआईजीको पदावधि ५ वर्ष राखिएको छ भने उमेरहदका आधारमा ५६ वर्षमा अवकाश तोकिएको छ । उनीहरु उमेरहदका आधारमा अवकाशमा जान लागेका हुन् ।
एआईजी भण्डारीको जन्ममिति २०२५ वैशाख ५ र चौधरीको सोही महिनाको ७ गते रहेको छ । उनीहरुबोहक डीआईजी विकाशराज खनालसमेत वैशाख ७ मै अवकाश जाँदैछन । उनी पनि डीआईजीको ५६ वर्षे उमेरहदकै कारण अवकाशमा जान लागेका हुन् । उनकोसमेत २०२५ वैशाख ७ जन्ममिति छ । एआईजी भण्डारी प्रहरी प्रतिष्ठान महाराजगञ्ज र मिरा प्रशासन विभाग प्रमुख छन् ।
त्यस्तै डीआइजी खनाल गण्डकी प्रदेश प्रहरी प्रमुख छन् । उनीहरुलाई किताबखानाले अवकाशको पत्र पठाइसकेको छ । त्यसैगरी डिआइजी सुरेन्द्रप्रसाद मैनाली पनि जेठको पहिलो साता घर जाँदैछन् । उनी जेठ १० गते अनिवार्य अवकाशमा जान लागेका हुन् । सुदूरपश्चिमका डिआइजी उमेशराज जोशीले असार १९ गते अवकाश पाउदैछन् ।
असार २१ गते पोषराज पोखरेलले अनिवार्य अवकाश पाउदैछन् । वैशाख ७ गते रिक्त रहने दुई एआइजीमा भने जोशी र पोखरेल नियुक्त हुने सम्भवना रहेको छ । मैनाली तुरुन्तै घर जाने भएकाले उनलाई सरकारले तत्काल एआइजी नबनाउने सम्भावना रहेको स्रोतले बताएको छ ।
