डोटी, २४ चैत । सुदूरपश्चिम प्रदेशका कैलाली र कञ्चनपुरका तीन जनामा कोभिड–१९ को संक्रमण देखिएपछि यहाँका अन्य जिल्लामा त्रास बढ्न थालेको छ ।
भारतबाट काम गरी फर्किएका नागरिकमा कोरोना भाइरसको संक्रमण देखिन थालेपछि यहाँका पहाडी जिल्ला डोटी, अछाम, बझाङ, बाजुरा, बैतडी, दाुर्चला र डडेल्धुराका स्थानीयमा त्रास बढ्न थालेको हो ।
यहाँका पहाडी जिल्लाबाट कामका लागि वर्षेनी बढीभन्दा बढी स्थानीयवासी भारततर्फ जानेको गरेको र अहिले पनि कामका लागि भारततर्फ गएका नेपालीहरु सीमावर्ती विभिन्न नाकाबाट फर्किने क्रम जारी राखेकाले स्थानीयवासीमा त्रास बढ्न थालेको दिपायल पिपल्लाका स्थानीयवासी किरण भण्डारीले बताए । उनले भने, ‘भारतबाट आएकामा कोरोना देखिन थाल्यो, हाम्रो गाउँका पनि धेरै जना भारतबाट आएका छन्, गाउँमा कोरोना आएको छ की भन्ने चिन्ता लाग्दै छ ।’
सुदूरपश्चिम प्रदेशमा शनिबार देखिएका संक्रमितमध्ये दुई कैलाली र एक कञ्चनपुर जिल्लाका रहेको सुदूरपश्चिम क्षेत्रीय स्वास्थ्य सेवा निर्देशनालय दिपायल राजपुरले जनाएको छ । संक्रमितमध्ये दुईजना भारतबाट रोजगारी गरेर फर्किका युवा भएकाले उनीहरुको साथमा आएका अन्य नागरिकमा पनि कोरोनाको सङ्क्रमण भएको हुनसक्ने आशंकामा डोटीका गाउँमा त्रास फैलिने अवस्था सिर्जना भएको बोगटान फुड्सिल गाउँपालिकाका अध्यक्ष कमलबहादुर गड्सिलाले बताए । ‘हुलका हुल मान्छे भारतबाट आएका छन्, कसैमा कोरोना देखिन थालेको छ, त्यही कारणले पनि अन्य नागरिकमा चिन्ता बढ्न थालेको हो ।’
संक्रमणको पुष्टि भएका कैलालीका २१ वर्षीय युवा चैत ११ गते लकडाउनपछि गौरीफण्टामा थुनिएका ९९९ मध्येका एक भएको खुल्नमा आएको सुदूरपश्चिम प्रदेश प्रहरी कार्यालय दिपायलले जनाएको छ । उनीहरुसँगै डोटी आएका केही व्यक्तिलाई जिल्लामा स्थापना गरिएका क्वारेन्टाइनमा राखिएको भए पनि सबै नागरिक क्वारेन्टाइनमा नभएका कारण पनि समस्या हुनसक्ने भन्दै यहाँका पहाडी जिल्लामा त्रास बढ्न थालेको स्थानीयवासी बताउँछन् । डोटीमा मात्रै चैत ११ गते यता भारतबाट आएका ४३४ जना क्वारेन्टाइनमा छन् । लकडाउनभन्दा अगाडि आएका सयौँ युवा गाउँगाउँ पसिसकेका छन् ।
डोटीका प्रमुख जिल्ला अधिकारी टेकनारायण पौडेलले लकडाउनभन्दा पहिले जिल्ला प्रवेश गरेका नागरिकको खोजी कार्य गरी क्वारेन्टाइनमा राख्ने तयारी भइरहेको बताए । उनले भने, ‘लकडाउनभन्दा पहिले जिल्ला प्रवेश गरेकाको खोजीकार्य शुरु गरेका छौँ, सबैलाई अनिवार्य क्वारेन्टाइनमा राख्ने छौँ ।’ जिल्लामा कोरोना भाइरस (कोभिड–१९) को संक्रमण फैलिन नदिन तथा रोकथामका लागि सम्पूर्ण तयारी पूरा गरिसकेकाले कोही कसैले डराउनुपर्ने अवस्था नरहेको प्रजिअ पौडेलले जानकारी दिए ।
जिल्लामा अहिलेसम्म कोरोनाको शंकास्पद बिरामी भेटिएका छैनन् । जिल्ला अस्पताल डोटीका अनुसार हालसम्म तीनको स्वाब परीक्षण गरिएको भए पनि सबैको नतिजा ‘नेगेटिभ’ आएको छ । कैलाली र कञ्चनपुरमा चारजना संक्रमितको पुष्टि भएपछि सतर्कता बढाउने प्रयत्न सरोकारवालाले गरिरहेका छन् । रासस
