काठमाडौं । काठमाडौंको रोपवे, बलम्बु र कीर्तिपुर फिडरको विद्युत् लाइन दुई दिन अवरुद्ध हुने भएको छ ।
विद्युत् प्राधिकरणले एक सूचना जारी गरी कीर्तिपुर वितरण केन्द्र अन्तर्गतको विद्युत् लाइन भूमिगत गर्नुपर्ने भएकाले आज (आइतबार) र भोलि (सोमबार) बिहान ११ बजेदेखि दिउँसो ३ बजेसम्म विद्युत् सेवा बन्द हुने जानकारी दिएको हो ।
आज रोपवे र बलम्बु फिडर अन्तर्गत पर्ने मैत्रीनगर र टेगलाफाँट क्षेत्रमा बिहान ११ बजेदेखि पाँच घण्टा बिजुली जानेछ ।
त्यसैगरी भोलि (सोमबार) कीर्तिपुर फिडर अन्तर्गत पर्ने कीर्तिपुर विश्वविद्यालय क्षेत्रमा पनि बिहान ११ बजेदेखि दिउँसो ३ बजेसम्म बिजुली जाने छ । साथै मौसम कामगर्न अनुकूल नभए विद्युत् अवरुद्ध हुनेछैन ।
