काठमाडौं । नेपाली कांग्रेस संसदीय दल कार्यसमिति र संसदीय दलको बैठक स्थगित भएको छ । आज दिउँसोका लागि तय गरिएका दुवै बैठक भोलिसम्मका लागि स्थगित गरिएको हो ।
आज स्थगित भएको संसदीय दल कार्यसमितिको बैठक जेठ १ गते बिहान ८ बजे र दलको बैठक ९ बजे बस्ने कांग्रेसले जनाएको छ । बैठक सिंहदरबारस्थित संसदीय दलको कार्यालयमा बस्ने छ ।
संसदमा सिर्जना भएको घटनाक्रमबारे थप छलफल गर्न कांग्रेले बैठक बोलाएको हो । कांग्रेसले सहकारी ठगीमा गृहमन्त्री रवि लामिछानेको संलग्नताबारे संसदीय छानबिन समिति गठन गर्नुपर्ने माग गर्दै आएको छ ।
सरकार समिति गठन गर्न तयार छैन भने प्रमुख प्रतिपक्षी कांग्रेसले आफ्नो माग पूरा नभएसम्म सदन चल्न नदिने अडान राखेको छ । यसअघिको हिउँदे अधिवेशन पनि कांग्रेसको अवरोधकै कारण समाप्त गरिएको थियो।
