काठमाडौं । प्रधानमन्त्री पुष्पकमल दाहाल ‘प्रचण्ड’लाई भेट्न नेपाली कांग्रेसका सभापति शेरबहादुर देउवासहित शीर्ष नेताहरु बालुवाटार पुगेका छन् ।
अहिले बिहान प्रधानमन्त्री प्रचण्डलाई भेट्न सभापति देउवा, उपसभापति पूर्णबहादुर खड्का, महामन्त्री गगन थापा, कृष्ण सिटौला र रमेश लेखकलगायतका नेताहरु बालुवाटार पुगेका हुन् । कांग्रेसले सहकारी ठगी प्रकरण मुछिएका गृहमन्त्री रवि लामिछानेमाथि संसदीय छानबिन समिति गठनको माग गर्दै लगातार संसद अवरोध गर्दै आएको छ ।
संसदको गतिरोध अन्त्यको प्रयासमा रहेका प्रधानमन्त्री प्रचण्डले छलफलका लागि कांग्रेसका नेताहरुलाई बोलाएको बालुवाटार स्रोतको भनाइ छ । अहिले प्रधानमन्त्री र कांग्रेस नेताहरुबीच छलफल भइरहेको बताइएको छ । छलफल संसदको गतिरोध अन्त्य र विश्वासको मत लिने विषयमा केन्द्रीत रहेको जनाइएको छ ।
