काठमाडौं । सशस्त्र प्रहरीमा राजनीतिक दलका नेता कार्यकर्ता तथा सञ्चारकर्मीसँग देखभेट गरेमा कडा कारबाहीको चेतावनी दिइएको छ । सशस्त्र प्रहरी अधिकृत र जवानहरूले राजनीतिक दलका नेताहरू सँग भेटघाट गर्ने र अनावश्यक रुपमा सरुवा बढुवाको दबाब दिने कार्य बढेपछि मुख्यालयले प्रतिबन्ध लगाएको हो । साथै, सशस्त्र प्रहरी अधिकृत तथा जवानहरूले सञ्चारकर्मीहरू सँग भेटघाट गर्ने र संगठनको हित विपरित कार्य गरेको भन्दै सञ्चारकर्मी भेटघाटका लागि केन्द्रीय प्रवक्ता र सहायक प्रवक्ता तोकिएको छ ।
राजनीतिक दलका नेता तथा कार्यकर्ता भेटघाटमा लगाएको प्रतिबन्धले प्रत्यक्ष असर डिआइजी अञ्जनीकुमार पोखरेललाई परेको छ । गत साता उनलाई राजनीतिक दलका नेताहरू भेटघाट गरेको र संगठनको विषयमा अर्नगल कुरा गरेको भन्दै मुख्यालयले स्पष्टिकरण सोधेको थियो ।
संगठनमा रहेर गर्नुपर्ने आचारसंहिता पालना नगरेको तथा संगठनको हित विपरीत कार्य गरेको आरोपमा स्पष्टीकरण सोधिएको हो । पोखरेलले सशस्त्र प्रहरीको एक कार्यक्रममा नेपाल प्रहरीलाई सीमा क्षेत्रबाट हटाउनुपर्ने र त्यहाँ सशस्त्रले कभर गर्नुपर्ने प्रस्ताव गरेका थिए ।
सो प्रस्तावको बारेमा कार्यक्षेत्रमा हस्तक्षेप गरेको भन्दै नेपाल प्रहरीले गृह मन्त्रालयमा गुनासो गरेको थियो । त्यसबाहेक उनले कोशी प्रदेशमा रहेका बेला पहाडी गुल्मबाट जनशक्ति ल्याएर धेरैलाई आउट छाडेको प्रमाणित नै भएको थियो ।
डीआईजी शम्भु सुवेदीलाई बाहिनी बुझाउने बेला डीआईजी पोखरेलले बाहिनीबाट १०९ जना बिदामा रहेको हाजिरी दिएका थिए । पहाडी गुल्मबाट कर्मचारी तानेर बाहिनी थुपारेका पोखरेलका कारण पूर्वी पहाडका गुल्म बेश जस्ता भएका थिए । गुल्ममा ५०–५५ जना जनशक्ति पनि छैनन् ।
त्यसपछि उनी मधेस प्रदेश जानका लागि माओवादी नेताहरूलाई भेटघाट गर्न पुगेका थिए । सो विषयलाई पनि संगठनले नोटिसमा राखेको जनाएको थियो । मधेस प्रदेशमा जान नपाएपछि उनले बराह बाहिनीमा केही अधिकृतहरुलाई बोलाएर संगठनमा आफूले जति राम्रो काम गरेको भए पनि राम्रो काम गर्नेलाई अवसर नदिएको भन्दै गुनासो गरेका थिए । बराह बाहिनीको कमाण्डमा उनी निकै विवादित भएका थिए ।
उनीसँगै एक एसएसपीलाई पनि स्पष्टिकरण सोधिएको छ । भर्खरै मिसनबाट फर्केर सुदुरपश्चिम पुगेका ती एसएसपीले मुख्यालयमा बस्नुप¥यो भन्दै राजनीतिक लविङ गरेपछि मुख्यालयले उनको नाममा पनि स्पष्टिकरण सोधेको हो । डिआइजी पोखरेलले आफूलाई सोधेको स्पष्टिकरणको जवाफ पठाइसकेका छन् भने न्यौपानेको जवाफ हेडक्वार्टरले कुरिरहेको छ ।
