काठमाडौं । नेपाली कांग्रेससँग सत्ता सहकार्य गर्ने सहमति भएसँगै एमालेका मन्त्रीहरूले राजीनामा दिने तयारी गरेका छन् ।
मंगलबार मध्यराति वर्तमान गठबन्धन तोडेर एमालेले नेपाली कांग्रेससँग सत्ता समीकरण बनाउने रहमति गरेपछि माओवादी अध्यक्ष पुष्पकमल दाहाल प्रचण्ड ‘नेतृत्व’को सरकारमा रहेका एमालेका मन्त्रीहरुले सामुहिक राजीनामा दिन लागेका हुन् ।
एमालेका प्रमुख सचेतक महेश बर्तौलाले नयाँ सरकार गठन प्रक्रियाका लागि आजै आफ्ना पार्टीका मन्त्रीहरूले राजीनामा दिने पुष्टि गरे ।
काँग्रेस–माओवादी गठबन्धन भत्किएसँगै गत २१ फागुनमा एमाले उपमहासचिव रघुवीर महासेठको नेतृत्वमा सरकारमा सहभागी भएको थियो । उपप्रधान तथा भौतिक पूर्वाधारमन्त्री महासेठ नेतृत्वमा एमालेबाट वर्तमान सरकारमा ८ मन्त्री छन् ।
