काठमाडौं । नेकपा (एकीकृत समाजवादी)ले केन्द्रीय कमिटीलाई पूर्णता दिएपछि मात्रै पदाधिकारी चयन गर्ने निर्णय गरेको छ ।
पार्टी कार्यालय आलोकनगरमा शनिबार बेसको महाधिवेशनपछिको केन्द्रीय कमिटीको पहिलो प्रथम बैठकले २ सय ९९ जनाको केन्द्रीय कमिटीले पूर्णता पाएपछि मात्रै पदाधिकारीलाई पूर्णता दिने निर्णय गरेको प्रवक्ता जगन्नाथ खतिवडाले जानकारी दिए ।
नेकपा समाजवादीले महाधिवेशनबाट अध्यक्ष, महासचिव र सम्मानीत नेताका साथै ९३ सदस्यीय केन्द्रीय कमिटी घोषणा गरेको छ । बाँकी सदस्यहरु चयनका लागि विधि र मापदण्ड तय गर्न आइतबार केन्द्रीय कमिटीको बैठक पुनः बस्ने खतिवडाले जानकारी दिए ।
बैठकले पार्टी पदाधिकारी चयन नभएकाले पार्टीको कामलाई अघि बढाउन अन्तरिम अवस्थाका लागि पुराना कमिटीका सदस्यहरुलाई नै जिम्मेवारी प्रदान गरिएको उनको भनाइ छ ।
बैठकले पार्टीको दशौ महाधिवेशनको सामान्य समिक्षा गर्दै पार्टीलाई थप ऊर्जा प्राप्त भएको निष्कर्ष निकालेको छ ।
