काठमाडौं । काभा यू २० महिला भलिबल च्याम्पियनसिपको सेमिफाइनलमा नेपाल किर्गिस्तानसँग पराजित भएको छ ।
माल्दिभ्सको मालेमा गएराति सम्पन्न खेलमा किर्गिस्तानसँग नेपाल ३–० को सोझो सेटमा पराजित भएको हो । नेपालले पहिलो सेट १४–२५, दोस्रो सेट २२–२५ र तेस्रो सेट १३–२५ ले गुमायो ।
लिग चरणबाट कीर्गिस्तान दोस्रो र नेपाल तेस्रो स्थानमा रहेर सेमिफाइनल पुगेका थिए । लिग चरणमा पनि नेपाल किर्गिस्तानसँग ३–० कै सोझो सेटमा पराजित भएको थियो । अब नेपालले तेस्रो स्थानका लागि आजै माल्दिभ्सको सामना गर्नेछ ।
फाइनलमा भने किर्गिस्तान र श्रीलङ्का भिड्नेछन् । पहिलो सेमिफाइनल खेलमा माल्दिभ्सविरुद्ध ३–० को सोझो सेटमा जित निकाल्दै श्रीलङ्का फाइनलमा पुगेको थियो । अब नेपालले तेस्रो स्थानका लागि मंगलबार नै माल्दिभ्सको सामना गर्नेछ ।
