काठमाडौं । जारी काभा नेसन्स वुमन्स लिगअन्तर्गत समूह चरणको अन्तिम खेल आज नेपालले आज मालदिभ्ससँग प्रतिस्पर्धा गर्दैछ ।
प्रतियोगिताअन्तर्गत लिग चरणका दुई खेल हुँदैछन् । पहिलो खेलमा दिउँसो १ बजे भारत र श्रीलंका तथा दोस्रो खेलमा अपराह्न ३ बजे नेपाल र मालदिभ्सबीच खेल हुँदैछ । दुवै खेलपछि मात्रै सेमिफाइलनमा हुने प्रतिस्पर्धाको टुंगो लाग्नेछ ।
नेपाल, भारत, इरान र श्रीलंका सेमिफाइनलमा पुगिसकेका छन् । मालदिभ्स भने एक खेल बाँकी छँदै बाहिरिसकेको छ । लिग चरणका चारवटै खेल खेलिसकेको इरानको सात अंक छ ।
त्यस्तै, तीन खेल खेलेको भारतको पनि सातै अंक छ । तीन खेल खेलेको नेपालको ६ अंक छ भने श्रीलंकाको चार अंक छ । मालदिभ्सले अंक जोड्न सकेको छैन । अंकतालिकाको शीर्ष स्थानमा रहेको र चौथो स्थान तथा दोस्रो र तेस्रो स्थानको टोलीबीच प्रतिस्पर्धा हुनेछ ।
नेपालले यसअघि लिग चरणमा दुई खेल जितेको छ भने एक खेलमा हार बेहोरेको छ । नेपालले आइतबार इरानसँग हार बेहोरेको थियो ।
