कलिलो तामालाई सोध राणालाई

पछिल्लो पुस्ता धेरैलाई थाहा नहुनसक्छ, नेपालको राजनीतिमा केपी शर्मा ओली जत्तिको इमानदार नेता यो देशमा जन्मिएका छैनन् भन्दा तपाईँहरू यसले के लेख्यो भनेर ट्वाँ पर्नुहोला । सादा जीवन, उच्च विचारका धनी ओलीले केका लागि पैसा कमाउनु, भएका सम्पत्ति त सरकारलाई दान दिइसके भने उनका बुबा, श्रीमतीबाहेक सन्तान पनि छैनन् ।

यस्ता योगीजस्ता नेता देशले पाउँदा पनि उनी आलोचनामुक्त हुन सकेनन् । उल्टै यो बुढेसकालमा गिरीबन्धु, यती, ओम्नी जलहरी के–के हो के–केको आरोप खेपिरहेका छन् । यो कुरा त अलि हजम भएन नि ! कसो विष्णु पौडेल कमरेड ?

पहिलोपटक प्रधानमन्त्री हुँदा ‘मैले भ्रष्टाचार गर्दिनँ, भ्रष्टाचार हुन पनि दिन्न’ भनेर हरेक मन्त्रालय, विभाग र सरकारी कार्यालयमा महान् वाणी टाँस्न लगाए । चौथोपटक प्रधानमन्त्री हुँदा पनि उनले त्यही महान् वाणी दोहो¥याइरहेका छन् । तै पनि देश र जनताका लागि केही गर्छु भन्ने हुटहुटी चलेका तिनै ओलीमाथि नानाथरि आरोप लाग्ने गरेको छ । प्रधानमन्त्रीले ‘मैले भ्रष्टाचार गर्दिनँ भन्न पनि नपाउने, हेप्नी ?

गिरिबन्धु टि स्टेटको जग्गासँग ओलीको गोरु बेचेको साइनो पनि छैन । ओलीले कानुन बनाएर उक्त जग्गा सट्टापट्टा गर्न पाउने निर्णय गर्नुभन्दा अगाडिदेखि गिरिबन्धुको जग्गा बेचबिखन भएकै हो, कसो, विश्वप्रकाशज्यू ? त्यसलाई व्यवस्थित गर्न सर्वोच्च अदालतले नै कानुन बनाएर सट्टापट्टा गर्नु भनेकै हो । त्यही आधारमा कानुन बनाएर जग्गा सट्टापट्टा गर्दा पनि फेरि त्यही सर्वोच्च अदालतको अर्को आदेशले रोक्यो । यसमा ओलीको के दोष ? ओली सर्वोच्चका प्रधानन्यायाधीश त होइनन् ।

बरु ओलीले आफू प्रधानमन्त्री भएको बेला शिवमाया तुम्वाहाम्फे र भूमिसुधार तचथा कानुनमन्त्री पद्मा अर्याललाई सर्वोच्चकै आदेशबमोजिम छिटोछिटो उक्त जग्गा सट्टापट्टा गर्ने कानुन निर्माण गर्न आदेश दिएका हुन् । यसमा कसरी नीतिगत भ्रष्टाचार भयो ? नीतिगत भ्रष्टाचारको अर्थ नबुझी अल्लारे सांसदहरुले त्यत्तिकै संसद्मा हल्ला मच्चाइरहेका छन् । नीतिगत निर्णयमा भ्रष्टाचार भए पद्मा अर्याललाई जेल हाल्नु नि, बेकारमा गिरिबन्धुमा ओलीबन्धुलाई किन बदनाम गर्नु ? १४ वर्ष जेल भ्रष्टाचार गरेर बसेका हुन् र ?

बिचौलिया दीपक मल्होत्रा को हुन्, ओलीले चिन्दैनन् । त्यति मात्र होइन, यती यती भनेर पनि संसद्भित्र र बाहिर कराएको सुनिन्छ । के हो यती भनेको, यती एयरलाइन्सको मालिक त ओली होइनन् । त्यसमा ओलीलाई किन मुछ्नु ?

गोकर्ण फरेष्ट रिसोर्ट सञ्चालन गर्न अवधि सकिन लागेको थियो । नेपाल ट्रष्टअन्तर्गतको त्यो जग्गा विधिवत् ऐन संशोधन गरेर ईश्वर पोखरेल रक्षामन्त्री हुँदा म्याद थप गरिएको हो । यसमा दोष भए ईश्वर पोखरेल दोषी हुन्, ओलीलाई किन जोड्नु ? ऐन संशोधन गरेर पनि म्याद थप्न नपाइने हेप्नी ? त्यसै वाहियात कुरा गरेर ओलीको बदनाम गर्न पाइन्छ ? कसो शंकर पोखरेल कमरेड ?

ओम्नी भनेको के हो ? कोरानाकालमा फास्टट्रयाकबाट चीनबाट औषधि ल्याउन कोटेशन मागिएको थियो । भानुभक्त ढकाल स्वास्थ्यमन्त्री थिए । ओम्नीलाई टेण्डर प¥यो, सामान आयो । त्यसमा ओलीलाई किन मुछ्नु ? मुछ्नै परे भानुभक्त ढकाललाई मुछ्नु नि, ओली स्वास्थ्यमन्त्री हुन् र ओम्नीमा जोड्न ? केही काम नपाएर व्यापारीलाई विद्युत् महसुल उठाउन नदिएको आरोप छ ।

विद्युत् महसुल उठाउने, नउठाउने जिम्मा ओलीको हो कि कुलमान घिसिङको ? अनि त्यसमा पनि ओलीलाई नै दोष ? ओली विद्युत्का हाकिम हुन् र ? ‘यत्रो ९ वर्षसम्म २१ अर्ब ८८ करोड विद्युत् महसुल किन उठाइएन ? किन १६ अर्ब उद्योगीलाई छुट दिइयो ?’ भनेर त उल्टै ओली स्वयंले प्रश्न उठाएकै छन् । चोरको खुट्टा काट भन्दा उचालेजस्तै… ।

पहिलोपटक प्रधानमन्त्री हुँदा ‘मैले भ्रष्टाचार गर्दिनँ, भ्रष्टाचार हुन पनि दिन्न’ भनेर हरेक मन्त्रालय र सरकारी कार्यालयमा महान् वाणी टाँस्न लगाए । चौथोपटक प्रधानमन्त्री हुँदा पनि उनले त्यही महान् वाणी दोहो¥याए । तै पनि तिनै ओलीमाथि नानाथरि आरोप लाग्ने गरेको छ । प्रधानमन्त्रीले ‘मैले भ्रष्टाचार गर्दिनँ भन्न पनि नपाउने, हेप्नी ?

नक्कली भुटानी शरणार्थीमा ओलीका पिए राजेश बज्राचार्यलाई कुनै बिचौलियाले एक करोड दिएको भनेर बयान दियो रे ? त्यो बिचौलियासँग के प्रमाण छ ? नक्कली भुटानी शरणार्थीमा जो जो संलग्न थिए, ती त जेल चलान भइसके । थप छानबिन हुन बाँकी छ । मुद्दै नटुंगिएसम्म फेरि ओलीमाथि नै लाञ्छना लगाउनु त पाप धुरीबाट कराउँछ भनेझैं हो । नभए, आरजु राणालाई सोधे भइहाल्यो नि, कलिलो तामालाई सोध राणालाई… ।

एनसेलमा त्यतिबेला बेकारको हल्ला मच्चाइयो– लाभकर छुट दिन लाग्यो भनेर ? लाभकर उठाउने काम प्रधानमन्त्रीको हो कि आन्तरिक राजस्वको ? आन्तरिक राजस्वले एउटा निर्णय गर्ने अनि मुख्यसचिव, अर्थसचिव, महालेखा परीक्षक भैसकेका जिम्मेवार व्यक्तिहरूले ओलीले खायो भनेर सडकमा हल्ला गर्ने ? ओलीले खायो कि खाएन भन्ने कुरा त अदालतको फैसला हाजिर छ, आखिर एनसेलले लाभकर तिर्याे त ? कसो सतिसलाल आचार्यज्यू ?

३३ किलो सुन काण्डको छानबिन गर्न समिति बनाएको ओलीले नै हो । प्रतिवेदन पनि बुझ्यो, तस्करलाई कारबाही गर्ने बेला सरकार ढल्यो, त्यसमा ओलीको संलग्नताको कुरा कहाँबाट आयो ? त्यो प्रतिवेदन खोजे भइहाल्यो नि, को को तस्कर हुन् तिनको भण्डाफोर त भइहाल्छ । यस्तो कुरा गर्दा दीपक मल्होत्रा किकन हाँस्छन् बडो ताजुब लाग्छ । अनि ओलीमाथि सुन तस्कर जोगाएको हल्ला कहाँबाट आयो ?

त्यस्तै, टेन्सन एकजना सांसदले दिए– उनले संसद्मै सुनको जलहरीलाई पित्तलको भने । सांसदको उक्त कुरा सुनेर दया लागेर आयो । पशुपतिमा सुनको जलहरी राख्ने निर्णय पो ओलीले गरेका हुन् । अब त्यहाँ सुनको राखियो कि पित्तलको राखियो, त्यो ओलीलाई के थाहा ? ओली कालिगड हुन् र ? फेरि मिडियाले हल्ला मच्चाए– १० किलो सुन गायब भयो भनेर…, आखिर हराएको १० किलो त त्यो टंकमणि भन्ने एकजना छट्टु छन्, तिनले पत्ता लगाएरै छाड्यो । वाहियात कुरा गरेर टाउको किकन दुःखाउनु ?

टुँडिखेलमा देउडा हेर्न जाँदा हुटिङ भयो । केही उरेन्ठेउला केटाहरुले हल्ला गरे, देउवा आउट, आउट भनेको ओलीको कानैले सुन्यो फेरि बजारमा हल्ला मच्चाइयो ओली आउट भनेर…, अनि ओलीसँग सिंगो युवापुस्ता नकारात्मक छ भनेर कसरी मूल्यांकन गर्ने ? कौवाले कान लग्यो भनेर कौवाको पछाडि दौडने होइन, पहिला आफ्नो कान छाम्नुस् । कसो रवि लामिछाने कमरेड ?