काठमाडौं । कञ्चनपुरमा डिउटीमा खटिएका प्रहरी टोलीमाथि आक्रमण भएको छ ।
पुनर्वास नगरपालिका–७ बुद्धबस्तीमा लंगुरबुर्जा (खडखडे) खेलिरहेको समूहलाई नियन्त्रणमा लिन खोज्दा इलाका प्रहरी कार्यालय (त्रिभुवनबस्ती) का प्रहरी निरीक्षक मोहनविक्रम शाहको टोलीमाथि कुटपिट भएको हो ।
बुधबार राति ११ बजेतिर खडखडे खेलिरहेको समूहलाई नियन्त्रणमा लिन खोज्दा आक्रमण भएको र आफुसहित ५ प्रहरीलाई सामान्य चोट लागेको प्रहरी निरीक्षक शाहले बताए ।
उक्त समूहले प्रहरीमाथि आक्रमण गर्नाका साथै प्रहरी टोली चढेको भ्यान तोडफोड गरेका छन् । प्रहरी भ्यानको अगाडिपिट्टको सिसा फुटेको जिल्ला प्रहरी कार्यालय कञ्चनपुरका डीएसपी उमेश जोशीले बताए ।
प्रहरी टोलीमाथि आक्रमण गर्ने कोही पनि समातिएका छैनन् । उनीहरूको पहिचान गरेर खोजी गरिने प्रहरीले जनाएको छ ।
