काठमाडौं । डडेलधुरामा ड्युटीमा खटिएका प्रहरी सहायक हवलदारलाई हातपात गरी घाइते बनाउने पाँच जनालाई प्रहरीले पक्राउ गरेको छ ।
अमरगढी नगरपालिका–५ बागबजारस्थित बसपार्कमा रहको प्रहरी पोस्टको ड्युटीमा खटिएका प्रहरी सहायक हवलदार थानेश्वर प्रकाश पन्तलाई ढुङ्गाले हानेर घाइते बनाउने पाँच जनालाई प्रहरीले पक्राउ गरेको हो ।
पक्राउ पर्नेहरुमा रोहित सार्की, विनोद बैज, पदम चटौत, सुवास बोहरा र जित ऐर रहेको जिल्ला प्रहरी कार्यालय डडेलधुराका प्रमुख प्रहरी नायव उपरीक्षक सुगन्ध श्रेष्ठले जानकारी दिए ।
मङ्गलबार बेलुकी करिब साढे ६ बजेको समयमा प्रहरी सहायक हवलदार पन्तले धनगढीबाट डडेलधुरातर्फ आइरहेको जीजे ०५ आरभी ८८४८ भारतीय नम्बर प्लेटको कार रोकेर चेकजाँच गर्ने क्रममा कारमा सवार विनोद बैजलगायत पाँच जनाले टाउकोको पछाडि भागमा ढुङ्गाले हान्दा पन्त घाइते भएका थिए ।
पक्राउ परेकाहरूलाई सार्वजनिक सुरक्षा हित, स्वास्थ्य र नैतिक विरुद्धको अपराधमा सात दिनको म्याद थप गरी अनुसन्धान कार्य भइरहेको प्रहरीले जनाएको छ । ढुङ्गा प्रहारबाट घाइते पन्तको धनगढीमा उपचार भइरहेको छ ।
