बागलुङ । आज बिहान बागलुङ दुर्घटनामा परी ज्यान गुमाएका पाँचै जनाको सनाखत भएको छ । मैमिनी नगरपालिका–७ मा सदरमुकाम बागलुङ बजार जाँदै गरेको भ्यान दुर्घटना हुँदा पाँच जनाको मृत्यु भएको हो ।
मृत्यु भएका पाँचै जनाको सनाखत भएको जिल्ला प्रहरी कार्यालय बागलुङका प्रहरी निरीक्षक केशव थापाले जानकारी दिए । प्रहरीका अनुसार दुर्घटनामा बागलुङ जैमिनी–८ केवई बस्ने ३८ वर्षीय चालक महेन्द्र पुन, २० वर्षीया रश्मी श्रीष, ५० वर्षीय नन्दकली पुन, १७ वर्षीय निरज श्रीष र ७५ वर्षीय कुलप्रसाद श्रीषको मृत्यु भएको छ ।
दुर्घटनामा केवई बस्ने ४५ वर्षीय गंगाबहादुर श्रीष घाइते छन् । उनको शरीरको विभिन्न भागमा चोट लागेको छ। उनको अवस्था मध्यम छ । ग २ च ९२४७ नम्बरको पिकअप भ्यान सडकदेखि एक सय मिटर तल खसेको थियो ।
