काठमाडौं । नेपाल धितोपत्र बोर्डको अध्यक्षको लागि तीन जनालाई अन्तर्वार्ताका लागि बोलाइएको छ । सिफारिस समितिको छनोटमा परेका नवराज अधिकारी, चिरञ्जीवी चापागाइँ र कृष्णबहादुर कार्कीलाई मंसिर ९ गते बिहान ८ बजे व्यावसायिक कार्ययोजनाको प्रस्तुतीकरण र अन्तर्वाताको लागि बोलाइएको हो ।
बोर्डको अध्यक्ष पद करिब एक वर्षदेखि रिक्त रहेको छ । सो पदमा करिब १९ जनाको आवेदन परेको थियो । जसमा छनोट भएका पाँच जनामध्ये दुई जनामात्रै प्रस्तुतिका लागि गएपछि उक्त प्रक्रिया अड्किदै आएको छ । पटक–पटक बोलाइएपनि उम्मेदवार अन्तर्वार्तामा अनुपस्थित हुँदै आएका छन् ।
धितोपत्र ऐन अनुसार सिफारिसमा परेका ३ जनामध्ये १ जनालाई अर्थमन्त्रीले बोर्डको अध्यक्षमा नियुक्ति गर्ने प्रस्ताव मन्त्रिपरिषदमा लैजाने व्यवस्था छ । त्यसपछि मन्त्रिपरिषदको सिफारिसमा एकजना बोर्डको अध्यक्ष बन्नेछन् । तर, पाँचजना आवेदकमध्ये तीनजना अनुपस्थित हुँदै आएका छन् ।
यसअघि असोज १८ गते अन्तरवार्ताका लागि बोलाइएको थियो । तर, सिफारिस समितका सदस्य नै बिरामी परेको भन्दै प्रक्रिया रोकिएको थियो ।
सरकारले बोर्ड अध्यक्ष छान्नका लागि राष्ट्रिय योजना आयोगका उपाध्यक्ष डा. मिनबहादुर श्रेष्ठको संयोजकत्वमा समिति गठन गरेको थियो । समितिको सदस्यमा अर्थसचिव डा. कृष्णहरि पुस्करसहित उदय निरौला छन् । बोर्ड अध्यक्ष रमेश हमालको कार्यकाल गत पुस २० गते सकिएपछि सो पद रिक्त छ ।
