काठमाडौं । झाँक्री प्रकाश भुजेलले चलाएको कारको ठक्करबाट घाइते भएका मोटरसाइकल चालकको मृत्यु भएको छ ।
बुधबार दिउँसो सवा १ बजेतिर साँखु–थली सडकखण्डमा उनले चलाएको कारको ठक्करबाट मोटरसाइकलमा सवार २ जना गम्भीर घाइते भएका थिए । जसमध्ये काठमाडौँ कागेश्वरी मनोहरा नगरपालिका २ आलापोटका अन्दाजी ३८ वर्षीय मोटरसाइकल चालक नारायण नगरकोटीको मृत्यु भएको हो ।
मोटरसाइकलको पछाडि बसेकी उनकी श्रीमती अन्दाजी ३२ वर्षीया किसानुमाया नगरकोटी भने गम्भीर घाइते भएकी छन् ।
घाइतेहरूलाई तत्काल नारायणटारस्थित शंखरापुर अस्पताल लगिएको थियो । त्यहाँबाट थप उपचारका लागि दुवै जनालाई ग्रान्डी अस्पताल टोखा लगिएको थियो । उपचारका क्रममा नगरकोटीको मृत्यु भएको काठमाडौं प्रहरी परिसरले जानकारी दिएको छ ।
दुर्घटनापछि कार घटनास्थलमै छाडेर फरार भएका झाक्रीलाई पक्राउ गरिसकेको काठमाडौँ प्रहरी प्रवक्ता एसपी नवराज अधिकारीले बताए । उनलाई प्रहरी वृत्त बौद्धको हिरासतमा राखेर अनुसन्धान भइरहेको प्रहरीले जनाएको छ ।
