स्याङ्जा, १७ जेठ । कोरोना भाइरस (कोभिड–१९)को संक्रमण देखिएपछि जिल्ला अस्पतालको आइसोलेशनमा राखेर उपचार गराइएका बिरामीको उपचारमा आयुर्वेदिक औषधिको प्रयोग गरिएको छ ।
कोरोना संक्रमणले महामारीको रुप लिएको अवस्थामा रोग प्रतिरोधात्मक क्षमता बढाउनका लागि आयुर्वेद तथा वैकल्पिक चिकित्सा विभाग काठमाडौँबाट तयार पारिएको प्रोटोकलअनुसार तयार पारिएको औषधि प्रयोगमा ल्याइएको हो ।
जिल्ला अस्पतालसँग समन्वय गरेर आफूहरुले काम गरिरहेको जिल्ला आयुर्वे्दिक अस्पताल लागिपरेको अस्पतालकी प्रमुख चिकित्सक सुभद्रा कार्कीले बताए । उनले भने, ‘स्थानीय जंगलमा गएर गुर्जोलगायतका जडीबुटी खोजेर ल्याएर संक्रमित बिरामीलाई ताजा गुर्जोको रसका साथै जडीबुटीबाट बनाएका औषधि खाने व्यवस्था मिलाएका छौँ ।’ गुर्जो, असोगन्धा चूर्ण, महासुदर्शन चूर्णलगायतका औषधिले रोग प्रतिरोधात्मक क्षमता बढाउने भएकाले यी औषधि प्रयोगमा ल्याएको जिल्ला आयुर्वे्दिक अस्पतालले जनाएको छ ।
भिडियो कन्फेरेन्सका माध्यमबाट आइसोलेशनमा रहेका संक्रमितलाई योग प्रणायामका साथै ध्यानका विधिसमेत आफूले सिकाउने गरेको डा कार्कीले बताउनुभयो । भारतबाट आएर वालिङको क्वारेन्टिनमा बसेका चार पुरुष र एक महिलामा कोरोना सङ्क्रमण देखिएपछि अहिले जिल्ला अस्पतालको कोरोना आइसोलेशन कक्षमा राखेर उपचार गरिएको छ भने एक महिलालाई पोखरा लगिएको छ । रासस
