काठमाडौं । आज (शुक्रबार) काठमाडौंमा सत्तारुढ दल एमालेसहित अन्य विभिन्न पक्षले एकै समय फरकफरक ठाउँमा शक्ति प्रदर्शन गर्दैैछन् । सरकारको नेतृत्व गरेको एमालेले दरबारमार्गमा शक्ति प्रदर्शन गर्दैछ ।
काठमाडौंका विभिन्न स्थानबाट ११ बजे बिहान सुरु हुने एमालेको जुलुस दरबारमार्ग पुग्नेर रोकिनेछ । त्यस्तै सोही समयमा सहकारी पीडितहरुको प्रदर्शन पनि जारी हुनेछ । उनीहरुले दुई दिनदेखि जारी राखेको आन्दोलनलाई आज पनि निरन्तरता दिने भएका छन् । उनीहरुले माइतीघरमा केन्द्रित भई प्रदर्शन जारी राखेका छन् ।
सहकारी ठगीमा संलग्नहरुमाथि छानबिन र कारवाही हुनुपर्ने अनि पीडितहरुको बचत फिर्ता हुनुपर्ने उनीहरुको मुख्य माग छ ।
यता, मेडिकल व्यवसायी दुर्गा प्रसाई समर्थकहरुले पनि काठमाडौंको कोटेश्वरमा प्रदर्शन गर्ने तयारी गरेका छन् ।
काठमाडौंका प्रमुख जिल्ला अधिकारी जयनारायण आचार्यका अनुसार राष्ट्र, राष्ट्रियता, धर्म, संस्कृति र नागरिक बचाउ महाभियानको नाम दिएर प्रसाईँका समर्थकहरुले प्रदर्शन गर्न लागेका हुन् ।
तीन पक्षले एकै समय फरक फरक ठाउँमा प्रदर्शनको तयारी गरेपछि आम नागरिकको शान्ति सुरक्षा कायम हुने गरी सुरक्षा प्रबन्ध मिलाइएको आचार्यले जानकारी दिए ।
