काठमाडौं । त्रिभुवन विश्वविद्यालयका विभिन्न अध्ययन संस्थान र संकायमा गरी आठ डीन नियुक्त गरेको भएका छन् ।
शनिबार बसेको त्रिवि कार्यकारी परिषद्को बैठकले चिकित्सा शास्त्र अध्ययन संस्थान (आईओएम)मा मोहनराज शर्मा, इन्जिनियरिङ अध्ययन संस्थान पुल्चोकमा सुशीलबहादुर बज्राचार्य, व्यवस्थापन संकायमा महानन्द चालिसे, मानविकी तथा सामाजिकशास्त्र संकायमा द्विविनन्द ढकाललाई नियुक्त गरेको छ ।
त्यस्तै कृषि र पशुविज्ञान अध्ययन संस्थानमा किशोरचन्द्र दाहाल, शिक्षाशास्त्र संकायमा वेदराज आचार्य, वन विज्ञान अध्ययन संस्थानमा ठाकुर सिलवाल र विज्ञान तथा प्रविधि अध्ययन संस्थानमा शंकर खनाल डिन नियुक्त भएका छन् ।
परिषद्ले डीन नियुक्तिका लागि पहिलो पटक कार्यविधि जारी गरी दरखास्त आव्हान गरेर प्रतिस्पर्धाको आधारमा नियुक्ति प्रक्रिया अघि बढाएको थियो । त्यस्तै, परिषद्ले दुई अनुसन्धान केन्द्र र एक निर्देशनालयमा निर्देशकहरू पनि नियुक्त गरेको छ ।
शिक्षा विकास तथा अनुसन्धान केन्द्र (सेरिड) मा राजेन्द्र कुँवर, व्यवहारिक विज्ञान तथा प्रविधि अनुसन्धान केन्द्रमा मिनाराज भण्डारी र त्रिवि योजना निर्देशनालयमा लक्ष्मीकान्त शर्मा नियुक्त भएका छन् । उनी सबैहरूलाई आज (आइतबार) पत्र हस्तान्तरण गरी पदस्थापन गर्ने कार्यक्रम रहेको रेक्टर खड्ग केसीले जानकारी दिए ।
