काठमाडौं । नेपाल प्रिमियर लिग (एनपीएल)को प्लेअफ समीकरण पूरा भएसँगै आज (मंगलबार) कुनै खेल तालिका राखिएको छैन ।
सोमबार लिग चरणको अन्तिम खेल सकिएसँगै क्वालिफायर र एलिमिनेटरमा प्रतिस्पर्धा गर्ने टोलीको छिनोफानो भएको थियो ।
आजको विश्रामपछि भोलि (बुधबार)देखि प्लेअफका खेल हुनेछन् । बुधबार बिहान ९ बजे सुरु हुने एलिमिनेटरमा चितवन राइनोज र कर्णाली याक्सबीच प्रतिस्पर्धा हुनेछ ।
यस्तै दिउँसो १ सुरु हुने पहिलो क्वालिफायरमा सुदूरपश्चिम रोयल्स र जनकपुर बोल्ट्सबीच प्रतिस्पर्धा हुनेछ । क्वालिफायरमा जित हासिल गर्ने टोलीले फाइनलमा स्थान पक्का गर्नेछ । पराजित टोलीले भने दोस्रो क्वालिफायरमा एलिमिनेटरको विजेतासँग प्रतिस्पर्धा गर्नेछ ।
दोस्रो क्वालिफायरमा विजयी भएको टोलीले भने फाइनलमा स्थान पक्का गर्नेछ । सो खेल बिहीबार दिउँसो सवा २ बजे सुरु हुनेछ । शनिबार हुने फाइनल खेल सवा १२ बजे सुरु हुनेछ ।
