बाँके । जमिनमुनिबाट सुन निकालिदिने भन्दै झण्डै दुई करोड रुपैयाँ ठगी गरेको आरोपमा एक भारतीय नागरिक पक्राउ परेका छन् । बाँकेको नेपालगञ्ज उपमहानगरपालिका–१९ स्थित मोहनपुर बस्ने नसिर अहमद बेहेनाको जाहेरीका आधारमा भारत उत्तरप्रदेश बलरामपुर सिहपुरीका ४२ वर्षीय सदाबुद्दिन हलवाई पक्राउ परेका हुन् ।
हलवाईले सुन निकालेर दिने प्रलोभनमा पारेर बेहेनाबाट पटक–पटक गरी करिब दुई करोड ठगी गरेको जिल्ला प्रहरी प्रवक्ता डिएसपी आयुशप्रशाद जोशीले जानकारी दिए ।
इँटाभट्टा रहेको जमिनभित्र सुन रहेको र उक्त सुन निकाली दिन्छु भनेर पटकपटक गरी दुई करोड ठगी गरेको जाहेरीका आधारमा उनलाई पक्राउ गरिएको डिएसपी जोशीले बताए । बेहेनाले मंसिर १५ गते हलवाईविरूद्ध प्रहरीमा जोहरी दिएका थिए ।
प्रहरीले हलवाइलाई पुस ५ गते नेपालगञ्ज वडा नम्बर ४ स्थित बसपार्कबाट पक्राउ गरेको थियो । पक्राउ परेका हलवाइलाई चार दिन थुनामा राखेर घटना अनुसन्धान गर्न जिल्ला अदालतले अनुमति दिएको छ । पक्राउ परेका हलवाईमाथि थप अनुसन्धान भइरहेका प्रहरीले जनाएको छ ।
