ओलीको निरंकुश र तानाशाही प्रवृत्तिविरूद्ध विरोध गर्न भीम रावलको आह्वान

काठमाडौं । नेकपा (एमाले)को निष्कासनमा परेका नेता भीम रावलले आफूलाई पार्टीबाट हटाउने निर्णयको विरोध गर्न आह्वान गरेका छन् ।

बिहीबार नेता रावलले सामाजिक सञ्जाल एक्सबाट पार्टी कार्यकर्ता र सर्वसाधारणले केपी ओलीको ‘अन्यायपूर्ण निर्णय’को विरोध गर्नेमा आफू विश्वस्त रहेको बताएका छन् ।

उनले लेखेका छन्– ‘सबै देशभक्त, न्यायप्रेमी, सुशासन, सुनिश्चित प्रणाली तथा जनताको समृद्धि र उज्यालो भविष्यप्रति प्रतिबद्ध इमान्दार पार्टी कार्यकर्ता र जनसमुदायले केपी ओलीको अन्यायपूर्ण निर्णयको विरोध गर्नेमा म विश्वस्त छु ।’

सत्ताको उन्मादमा ओलीले निरंकुश, स्वेच्छाचारी र तानाशाही निर्णय गरेको उनको भनाइ छ । उनले भनेका छन् ‘निर्माण र विस्तारका साथै राष्ट्रियता, स्वाधीनता, समृद्धि, जनाधिकार, न्याय र समानताका लागि निरन्तर सक्रिय रहेर योगदान गर्दै आएकोमा देश, जनता, सुशासन, विधि, पद्धति, सदाचार, सत्य र तथ्यको पक्षमा उभिएकोमा मलाई पार्टी सदस्यबाट हटाउने केपी ओलीको निर्णय सत्ताको उन्मादमा गरिएको निरंकुश, स्वेच्छाचारी र तानाशाही निर्णय हो ।’