काठमाडौं । सर्लाहीको बरहथवामा मोटरसाइकल दुर्घटना हुँदा दुई जनाको मृत्यु भएको छ ।
गएराति ८ बजेतिर नयाँरोड–मधुवनी सडकखण्ड अन्तर्गत बरहथवा नगरपालिका–९ मूर्तियामा उखु लिएर हरिवनस्थित इन्द्रशंकर चिनी उद्योगतर्फ जाँदै गरेको ट्याक्टरसँग मोटरसाइकल ठोक्किँदा दुई जनाको मृत्यु भएको हो ।
मृत्यु हुनेहरुमा मोटरसाइकल चालक बरहथवा नगरपालिका–५ का २५ वर्षीय हरिन्द्र महतो र मोटरसाइकलको पछाडि सवार सोही ठाउँमा २२ वर्षीय पुरुषोत्तम दास रहेको इलाका प्रहरी कार्यालय बरहथवाका प्रहरी नायब उपरीक्षक (डीएसपी) गौतम थापाले जानकारी दिए ।
दुर्घटनामा गम्भीर घाइते भएका हरिन्द्रको एडभान्स सञ्जीवनी अस्पताल बरहथवामा मृत्यु भएको हो । त्यसैगरी पुरुषोत्तमको बयोधा अस्पताल वीरगन्जमा मृत्यु भएको प्रहरीले जनाएको छ । दुर्घटनापछि ट्याक्टर र चालकलाई नियन्त्रणमा लिएर थप अनुसन्धान अघि बढाइएको प्रहरीले जनाएको छ ।
