काठमाडौं । नेपाल क्यान्सर निवारण प्रतिष्ठान र जे एण्ड जे हेल्थ एकेडेमीबीच क्यान्सर क्षेत्रका विभिन्न कार्यमा साझेदारी एवं सहकार्य गर्ने सम्झौता भएको छ । सो सम्झौता पत्रमा जे एण्ड जे हेल्थ एकेडेमीका प्रमुख डा रिजुता जोशी झा र नेपाल क्यान्सर निवारणका अध्यक्ष हरि गोपाल प्रधानले शनिबार एक कार्यक्रमबीच हस्ताक्षर गरेका छन् ।
साे सम्झौताअनुसार क्यान्सर निवारणबारे स्वास्थ्य शिविरहरू तथा जनचेतना अभियानहरू आयोजना गरिने छ । साथै, नेपाल क्यान्सर निवारण प्रतिष्ठानका आजीवन सदस्यलाई विशेष सहुलियत र सुविधा उपलब्ध गराइने बताइएको छ । उक्त सम्झौता भएसँगै क्यान्सर निवारण तथा क्यान्सरका बिरामीका लागि थप सेवा एवं सुविधा पुग्ने विश्वास गरिएको छ ।
सम्झौता हस्ताक्षर कार्यक्रममा जे एण्ड जे अस्पतालका प्रमुख डा. रिजुता जोशी झा, गाइनो अन्कोलोजिस्ट डा. रोशनकुमार झा र नेपाल क्यान्सर निवारणका अध्यक्ष हरि गोपाल प्रधान, वरिष्ठ उपाध्यक्ष निर्णय श्रेष्ठ र अर्का उपाध्यक्ष सागर कटवाल लगायतको उपस्थिति थियो ।
