लस एन्जलस । लस एन्जलसको जंगलमा मंगलबारदेखि लागेको डढेलो अनियन्त्रित भएको छ । जंगली डढेलो सहर पस्दा दर्जनौँ घर नष्ट भएको छ भने दशौँ हजार मानिस घर छाडेर भागेका छन् । अमेरिकी मिडियाका अनुसार उच्च वर्गीय प्यासिफिक पालिसेड्स छिमेकी क्षेत्र नजिकैको आगो निभाउने क्रममा कम्तीमा पाँच जनाको मृत्यु भएको छ भने एक दमकलकर्मी घाइते भएका छन् ।
भयानक हावाले आगोलाई फैलाउँदै सयौँ मिटर टाढासम्म उडाउँदै असहाय दमकलकर्मीहरूले निभाउन नसक्ने गरी नयाँ स्थानहरूमा आगो सल्किँदै गएको छ । बिहान हुँदा लस एन्जलसमाथि धुवाँको विशाल पर्दा देखिन्थ्यो र हावामा जलेको तीखो गन्ध थियो । सहरका मेयर करेन बासले चेतावनी दिँदै भने, ‘आँधी झन् खराब हुने देखिन्छ ।’
लस एन्जलस टाइम्सका अनुसार पालिसेड्समा केही दमकलकर्मीले हाइड्रेन्टमा पानीको कमी सामना गरिरहेका छन् । त्यहाँको आगोले अहिलेसम्म लगभग तीन हजार एकड (१,२०० हेक्टर) भूमि जलाइसकेको छ । लस एन्जलसको उत्तरमा अल्टाडेना वरपर दुई हजार दुई सय एकडमा भएको इटोन आगलागीमा एएफपीका एक पत्रकारले आपत्कालीन कामदारहरूले वृद्ध बिरामीहरूलाई उनीहरूको हेरचाह सुविधाबाट ह्विलचेयरमा बाहिर निकाल्दै गरेको देखेको बताए ।
तेस्रो आगो सान्ता क्लारिटाको वरिपरि लागिरहेको छ । प्यासिफिक पालिसेड्सको आगलागीले क्यालिफोर्नियाको सबैभन्दा मनपर्ने स्थानहरूमध्ये एकमा दर्जनौँ घर नष्ट भइसकेको छ । त्यहाँ हलिउडका सेलिब्रेटीहरू करोडौँ डलरको घरमा बस्नेहरूमध्ये छन् । कतिपय सेलिबे्रटीका घर जलेर नस्ट भएको छ । सेलिब्रेटीहरुको घर जलेर नस्ट भएको भनिएपनि यकिन हुन सकेको छैन । उक्त क्षेत्रमा थ्रप्रै हलिउड सेलिब्रेटीहरुको घर रहेको छ ।
एमी पुरस्कार विजेता अभिनेता जेम्स वुड्सले आफ्नो घर खाली गर्न तयार हुँदै गर्दा आफ्नो घरनजिकैका रूख र झाडीहरूमा आगो लागेको भिडियो पोस्ट गरेका छन् । सबै आगोका अलार्म बजिरहेको उनले बताए । ‘हाम्रो पहाडको प्यारो सानो घर यति लामो टिक्यो भन्ने मलाई विश्वास लाग्दैन । यो कुनै प्रियजनलाई गुमाए जस्तो महसुस भइरहेको छ’ उनले भने ।
मंगलबार साँझ जेनिफर लोपेजको नयाँ फिल्म ‘अनस्टपेबल’को रेड–कार्पेट प्रिमियरसहित क्षेत्रभरका कार्यक्रमहरू रद्द गरिएको थियो । स्क्रिन एक्टर्स गिल्ड अवार्डले बुधबारको व्यक्तिगत नामांकन समारोहलाई प्रेस विज्ञप्तिले प्रतिस्थापन गरेको थियो ।
राष्ट्रपति जो बाइडेनले आफूले डढेलो बारेमा बारम्बार जानकारी लिइरहेको बताएका छन् ।
