काठमाडौं । खोटाङको दिक्तेलबाट काठमाडौं आउँदै गरेको टाटा सुमोमाथि तोडफोड भएको छ । बुधबार साँझ बीपी राजमार्ग अन्तर्गत काभ्रेको भकुण्डेबेंसीस्थित पात्लेखेतमा तुवाचुङ माराति यातायातको ना १ज ६१७२ नम्बरको सुमो तोडफोड भएको हो ।
विपरीत दिशाबाट आउँदै गरेको निजी कारमा सवार व्यक्तिहरूले बाटो नछोडेको भन्दै चालकलाई कुटपिट गर्दै ढुंगामुढासहित सुमाे तोडफोड गरेको पाइएको प्रहरीले जनाएको छ ।
यात्रु लिएर काठमाडौं आउँदै गरेको सुमो तोडफोड गर्ने ९ जनालाई पक्राउ गरिसकेको जिल्ला प्रहरी कार्यालय काभ्रेका प्रहरी नायब उपरीक्षक मिनबहादुर घलेले जानकारी दिए ।
उनीहरुमाथि घटना सम्बन्धमा अनुसन्धान भइरहेको उनले बताए । गत असोज १० र ११ गतेको अविरल वर्षाका कारण रोशीखोला आसपासमा गएको बाढी पहिरोले क्षतिग्रस्त बनेको उक्त सडकखण्ड अहिले साँघुरो छ ।
