काठमाडौं । काठमाडौंको ठमेलबाट एक चिनियाँ नागरिक अपहरण गरेको आरोपमा ३ जना भारतीय नागरिकलाई प्रहरीले पक्राउ गरेको छ । प्रहरीले उनीहरुलाई मकवानपुरको भिमफेदीबाट पक्राउ गरेको हो ।
ठमेलबाट भारतीय नम्बर प्लेटको गाडीमा चिनियाँलाई राखेर लगेको खबर पाएपछि पछ्याएर आरोपीहरूलाई पक्राउ गरिएको उपत्यका अपराध अनुसन्धान कार्यालयका एसएसपी सानुराम भट्टराईले जानकारी दिए ।
मंगलबार अपहरणको सूचना पाएपछि अपराध अनुसन्धान कार्यालयको टोली पीडितको उद्धारमा खटिएको थियो । तर, भारतीय नम्बरको गाडी नियन्त्रणमा लिए पनि चिनियाँ नागरिक फेला परेका छैनन् । उनी भिमफेदीको जङ्गलतर्फ भागेको बताइएको छ । मकवानपुर प्रहरी र अपराध अनुसन्धान कार्यालयको टोलीले थप अपहरणकारी र पीडितको खोजी गरिरहेका छन् ।
