काठमाडौं । वरिष्ठ अधिवक्ता दिनेश त्रिपाठीमाथि कुटपिटमा संलग्न थप एक जनालाई प्रहरीले पक्राउ गरेको छ । प्रहरीले झापा बुद्ध शान्ती गाउँपालिका–४ घर भई काठमाडौं शान्तीनगर बस्ने ५५ वषीया शीतल राई भन्ने सितादेवी राईलाई पक्राउ गरेको हो ।
स्वर्णलक्ष्मी सहकारीकोे रकम अपचलनका प्रतिवादी रवि लामिछानेविरुद्धको मुद्दामा यहि माघ २ गते काठमाडौं जिल्ला अदालतमा त्रिपाठीले सहकारीपीडितको तर्फबाट बहस गरेका थिए । बहस सकेर अदालतबाट बाहिरिँदै गर्दा त्रिपाठीमाथि कुटपिट भएको थियो । राई समातिएसँगै त्रिपाठीमाथि कुटपिट आरोपमा पक्राउ परेका व्यक्तिहरूको संख्या ३ जना पुगेको जिल्ला प्रहरी परिसर काठमाडौंले जनाएको छ ।
यसअघि हुम्ला अदानचुली गाउँपालिका– ४ घर भई काठमाडौं सूर्यदर्शन हाइट बस्ने ३२ वर्षीय महेन्द्र पाण्डे र दोलखा तामाकोशी गाउँपालिका– १ घ भई ललितपुर महालक्ष्मी– ५ टिकाथली बस्ने ४८ वर्षीय ललितकुमार केसी पक्राउ परेका थिए । पक्राउ परेकाहरूमाथि प्रहरी वृत्त सिंहदरबारबाट थप अनुसन्धान भइरहेको प्रहरीले जनाएको छ ।
