काठमाडौं । भक्तपुरमा कार र मोटरसाइकल ठोक्किंदा घाइेते भएकी महिलाको मृत्यु भएको छ । गएको सोमबार कार र मोटरसाइकल ठोक्किँदा घाइते भएकी पेप्सीकोला बस्ने मोटरसाइकल चालक राजु राईकी श्रीमती सपना राईको मृत्यु भएको प्रहरीले जनाएको छ ।
सोमबार मध्यपुरथिमि नगरपालिका–२ दिव्यश्वरीस्थित सडकमा पेप्सीकोलाबाट मगर गाउँतर्फ जाँदै गरेको बा.प्र.०१–०२७च.९२७ नम्बरको कार र सोही दिशातर्फ जाँदै गरेको बा.५० प.७४१ नम्बरको मोटरसाइकल ठोक्किएका थिए ।
दुर्घटनामा गम्भीर घाइते भएकी सपनालाई उपचारका लागि मदरल्याण्ड अस्पताल लगिएको थियो । त्यहाँबाट थप उपचारका लागि काठमाडौं मेडिकल कलेज सिनामंगल लगिएको थियो । उनको उपचारका क्रममा गएराति मृत्यु भएको प्रहरीले जनाएको छ ।
सपनाको शव अस्पतालमै राखिएको छ ।दुर्घटनामा घाइते भएकी उनकी तीन वर्षीया छोरी ईश्वरीको सोही अस्पतालमा उपचारपछि डिस्चार्ज गरिएको छ ।
कार चालक रामेछाप सुनापाती गाउँपालिका–१ घर भइ बूढानीलकण्ठ–४ बस्ने ३४ वर्षीय कृष्णप्रसाद गौतमलाई प्रहरी वृत्त ठिमिले नियन्त्रणमा लिएको छ । दुर्घटनाबारे थप अनुसन्धान भइरहेको जिल्ला प्रहरी परिसर भक्तपुरले जनाएको छ ।
