काठमाडौं, १३ असार ।
नेपालमा कोरोना संक्रमण ७७ जिल्लामै फैलिएको छ । शनिबार रसुवामा पनि कोरोना संक्रमण पुष्टि भएको छ । रसुवाका ११ जनामा कोरोना संक्रमण पुष्टि भएको हो ।
पछिल्लो २४ घन्टामा देशभरिका २२ वटा प्रयोगशालामा भएको परीक्षणमा थप पाँच सय ५४ जनामा कोरोना संक्रमण पुष्टि भएको छ ।योसमेत नेपालमा संक्रमितको संख्या १२ हजार तीन सय नौ पुगेको स्वास्थ्य तथा जनसंख्या मन्त्रालयले जनाएको छ ।
मन्त्रालयले शनिबार गरेको नियमित मिडिया ब्रिफिङमा प्रवक्ता डा. जागेश्वर गौतमले संक्रमित हुनेमा महिला एक सय २० र पुरुष चार सय ३४ रहेको जानकारी दिए । विगत २४ घन्टामा चार हजार ६ सय ६ जनाको पिसिआर परीक्षण भएको उनले बताए । मन्त्रालयका अनुसार संक्रमित भई आइसोलेसन बस्नेको संख्या नौ हजार चार सय ४७ छ । त्यसैगरी क्वारेन्टाइनमा बस्नेको संख्या घटेर ६५ हजार सात सय १२ मा झरेको छ ।
पछिल्लो २४ घन्टामा संक्रमणमुक्त भएर डिस्चार्ज हुनेको संख्या एक सय ३६ रहेको गौतमले बताए । गौतमका अनुसार हालसम्म दुई सय ४२ महिला दुई हजार पाँच सय ९२ पुरुष गरी जम्मा दुई हजार आठ सय ३४ जना डिस्चार्ज भइसकेका छन् ।
