काठमाडौं । खानेपानी मन्त्री प्रदीप यादवका निजी सचिव भक्तराज जोशीले मन्त्रालय र मातहतका कार्यालयमा चर्को हस्तक्षेप गर्र्दैआएका छन् । कर्मचारी प्रशासन शाखाको प्रमुखको समेत दोहोरो जिम्मेवारीमा रहेका जोशी सरुवा बढुवादेखि करारमा कर्मचारी भर्ति र ठेक्कापट्टामा समेत मन्त्री यादवको नाम लिंदै कार्यालय प्रमुखहरुसँग मोलमोलाइ गर्दैआएका छन् ।
करारदेखि ज्यालादारी कर्मचारी भर्ना गर्दासमेत मन्त्री यादवको चाहना बमोजिम अर्थ संकलन गर्दैआएका जोशीको कार्यशैलीबाट मातहतका कार्यालय प्रमुख आजित छन् । खानेपानी मन्त्रालयको प्रशासनिक नेतृत्व गर्दैआएकी सचिव प्रमिला शाक्य बज्राचार्य जोशीकै इशारामा चल्दा मन्त्रालयको चेन अफ कमाण्ड भत्किन पुगेको छ ।
मन्त्रालयको प्रशासनिक नेतृत्व कमजोर भएको लाभ निजी सचिव जोशीले उठाउँदैआएका छन् । पीए जोशीमार्फत् खानेपानी मन्त्री यादवले मच्चाएको ब्रम्हलुट अभियानका कारण मन्त्रालयका कर्मचारी तनावमा छन् । सचिव बज्राचार्यलाई दबाब दिएर आफ्नो स्वार्थका काम गराउँदै आएका मन्त्री यादवले खानेपानी बिभाग अन्तर्गतका कर्मचारीहरुबाट मासिक असुली गर्न छाडेका छैनन् ।
सानोभन्दा सानो काममा समेत चासो राख्दैआएका उनको कार्यकालमा हालसम्म करार र ज्यालादारीमा काम गरिरहेका १ सय भन्दा कर्मचारीलाई जागिरबाट हटाएका छन् । ती ठाउँमा दररेट लिंदै नियुक्ति गरिएको आरोप छ । करार र ज्यालादारीमा भर्ति गर्दा प्रतिब्यक्ति १ देखि ३ लाख रुपैयाँसम्म जोशी र यादवले असुली गरेको स्रोत बताउँछ । आश्चर्यको कुरा के छ भने खानेपानी बिभागले हालसालै करिब ३० जना इन्जीनीयर करारमा राख्ने बिज्ञापन सूचना निकाल्यो ।
बिज्ञापन निकालेपछि करिब १ हजार ७ सय इन्जीनीयरले आवेदन दिए । उक्त आवेदनलाई लत्याएर मन्त्री यादव र उनका पीए जोशीको सेटिङमा भित्रभित्रै माग भएको दरबन्दीमा रकम लिएर नियुक्ति गरिसकिएको स्रोत बताउँछ । आवेदन नदिएकाहरुलाई प्रतिब्यक्ति ५ लाखभन्दा बढी लिएर नियुक्ति दिइसकिएको भए पनि अझै सो विज्ञापन रद्द भने गरिएको छैन ।
जोशी गृहमन्त्री रमेश लेखक निकट मानिन्छन् । गृहमन्त्रीमा लेखक आएपछि उनी गृहमन्त्रालयमा जाने दाउमा रहेका थिए । तर भ्रष्टाचार गर्न प्रदीप यादवसँग सहज हुने भएकाले जोशी उनको निजी सचिव बन्न पुगेको भेद बिस्तारै खुलेको छ ।
