सुनसरी । केन्द्रीय प्रविधि क्याम्पस धरानको स्वतन्त्र विद्यार्थी युनियनको सभापतिमा स्वतन्त्र उम्मेदवार पेसलराज कार्की निर्वाचित भएका छन् । सत्ता साझेदार दल नेपाली कांग्रेस नेविसंघ र एमालेको भातृ संस्था अनेरास्ववियुका साझा उम्मेदवार अनिरुद्र श्रेष्ठलाई पराजित गर्दै कार्की निर्वाचित भएका हुन् ।
कार्कीले ४ सय १३ मत प्राप्त गरे भने पराजित अनेरास्ववियुका श्रेष्ठले ३ सय ६४ मत प्राप्त गरे । सचिव भने नेविसंघका विश्वस्वरप्रसाद बडु निर्वाचित भएका छन् । निर्वाचित बडुले ४ सय २७ मत प्राप्त गरि स्वतन्त्रका विकास तामाङलाई पराजित गरेका हुन् ।
यस्तै, कोषाध्यक्षमा पनि स्वतन्त्रकै नाम्छाङ राई ४ सय ८ मत प्राप्त गरी निर्वाचित भएका छन् । उनका निकटतम प्रतिद्वन्दी अनेरास्ववियुका भुवन शाहशंकरले ३ सय ५९ मत प्राप्त गरेका छन् ।
सदस्यहरूमा स्वतन्त्रकै बरदान राई, निशान पराजुली, अनेरास्ववियुका निजल तामाङ, दिब्या रायमाझी, अस्मिता सुवेदी, क्रान्तिकारीका राजकुमार कठेत र नेविसंघका हाङ्सु लिम्बू निर्वाचित भएका छन्।
