काठमाडौं । प्रधानमन्त्री केपी शर्मा ओलीले मुलुकका अन्धकार कुनै एक व्यक्तिका कारणमात्रै नहटेको बताएका छन् ।
उनले त्यसअघिका विभिन्न सरकारहरुले गरेका कामका कारण लोडसेडिङमुक्त भएको उल्लेख गर्दै एक व्यक्तिले मात्रै गरेको हो भन्ने भ्रममा नपर्न आग्रह गरेका छन् ।
बालुवाटारमा भएको कार्यक्रममा सम्बोधन गर्दै ओलीले भने– ‘नियुक्तिको भोलिपल्ट चिम बोकेर आउनुभयो कि ट्रान्समिसन लाइन बोकेर आउनुभयो ?’
प्रधानमन्त्री ओलीले देउवाले गल्ती गरेर कुलमानलाई दोहोर्याएर ल्याएको बताए । उनले भने, ‘हिजो त्यही काम गरेको अर्को एक जनालाई निकालेर काम नभएको पद, ठाउँमा सरुवा गरिदिनुभयो । अनि रिटायर्डलाई ल्याएर राखिदिनुभयो ।’
ओलीले कुलमानप्रति आक्रोश व्यक्त गर्दै प्रमिथसले पृथ्वीमा आगो ल्याएझैँ लोडसेडिङ अन्त्यको चमत्कार कसरी गरे ? भनी प्रश्न गरेका थिए ।
