काठमाडौं । दक्षिण कोरियाको सान्चेओङ काउन्टीबाट सुरु भएको डढेलो नियन्त्रण बाहिर गएको छ । उक्त डढेलोमा परी अहिलेसम्म २६ जनाको मृत्यु भइसकेको छ भने ३० जना घाइते भएका छन् ।
यो डढेलो दक्षिण कोरियाको अहिलेसम्मकै सबैभन्दा ठुलो भनिएको छ । कोरियन समाचार एजेन्सीहरुका अनुसार मृत्यु हुने अधिकांश बृद्धबृद्धा रहेका छन् । बुधबार डढेलो नियन्त्रणका लागि परिचालन गरेको हेलिकप्टर दुर्घटना हुँदा एकजना पाइलटको मृत्यु भएको थियो । कम्तीमा ३ जना अग्नि नियन्त्रकहरूले पनि ज्यान गुमाइसकेको दक्षिण कोरियाको समााचर एजेन्सी केसीएनले उल्लेख गरेको छ ।
डढेलो नियन्त्रण गर्नका लागि हजारौँ अग्नि नियन्त्रकहरूका साथै सैनिक परिचालन गरिएको छ । डढेलो सांस्कृतिक सम्पदाहरूमाथि ठुलो खतरा बनेको छ । उइसोङ सहरमा आगलागीका कारण सन् ६१८ मा बनेको गौन्सा मन्दिर ध्वस्त बनेको समाचारमा बताइएको छ ।
गत शुक्रबार डढेलो सान्चेओङ काउन्टीबाट सुरु भएको थियो । हालसम्म यो थप ६ वटा काउन्टीमा फैलिसकेको छ । तीव्र र सुक्खा हावाको कारण यो अझ फैलिरहेको छ र अहिले डढेलो नियन्त्रण बाहिर गएको छ । दक्षिण कोरियाको विपद् व्यवस्थापनका प्रमुख ली हान क्युङले बिहीबार डढेलो ३५ हजार ८१० हेक्टरमा फैलिसकेको बताएका छन् ।
