काठमाडौं । राजावादीहरूले काठमाडौंमा भोलि (शुक्रबार) गर्ने प्रदर्शन शान्तिपूर्ण हुने जनाएका छन् । तर, विज्ञानको नियम सम्झाउँदै उनीहरूले क्रिया भए प्रतिक्रिया पनि हुनसक्नेतर्फ सचेत गराएका छन् ।
भोलि काठमाडौंमा राजावादी र गणतन्त्रवादीहरूले छुट्टाछुट्टै प्रदर्शन गर्दैछन् । काठमाडौं प्रशासनका अनुसार राजावादीहरूको प्रदर्शन तिनकुने र गणतन्त्रवादीहरूको प्रदर्शन भृकुटीमण्डपमा हुनेछ ।
सोही प्रदर्शनबारे जानकारी गराउन बिहीबार आयोजित पत्रकार सम्मेलनमार्फत् ‘राजसंस्था पुनर्स्थापनाका लागि संयुक्त जनआन्दोलन समिति’ का संयोजक नवराज सुवेदीले द्वन्द्व, मुठभेड, तोडफोड, आगजनी, आमहडताल, ध्वंसात्मक हिंसा प्रतिहिंसा र गृहकलह धान्न वा सहन नसक्ने यथार्थ सम्झाएका छन् ।
उनले आफूहरू संवेदनशील भएको जिकिर गर्दै शान्तिपूर्ण सहकार्यको प्रक्रिया रोजेको भन्दै त्यसलाई कमजोरी नठान्न पनि चेतावनी दिएका छन् ।
‘विज्ञानको नियम अनुसार क्रिया भएपछि प्रतिक्रिया त हुन्छ नै । यदि यसलाई हाम्रो कमजोरी ठानेर बेवास्ता वा उपेक्षा भएमा त्यसको परिणाम अनुकूल नहुन सक्छ,’ सुवेदीले पत्रकार सम्मेलनमार्फत भनेका छन् ।
आफूहरूको पहिलो प्राथमिकता राजसंस्था पुनस्र्थापना गरेर सर्वपक्षीय सम्मेलनबाट सहमतिको बाटोमा अघि बढ्ने रहेको बताए ।
देश इतिहासकै असाधारण अवस्थाबाट गुज्रिरहेको, राज्यका कुनै अंग स्वस्थ नभएको र उपचारका लागि ढिला भइसकेको बताए ।
संवैधानिक राजसंस्थाको पुनस्थापना, सनातन हिन्दू अधिराज्यको पुनस्थापना, संघीयता खारेजी, भ्रष्टाचार नियन्त्रण र सुशासन राजावादीहरूको मूल माग छ ।
