काठमाडौं । आइतबार प्रधानमन्त्री केपी शर्मा ओलीले बोलाएको गणतन्त्र पक्षधर दलहरूको बैठकमा नेकपा माओवाद केन्द्रका अध्यक्ष पुष्पकमल दाहाल प्रचण्ड र नेकपा एकीकृत साजवादीका अध्यक्ष माधव नेपाल गएनन् ।
आइतबार साँझ सिंहदरबारमा बसेको बैठकमा प्रचण्ड र माधव उपस्थित थिएनन् । जहाँ, माओवादीबाट बरिष्ठ उपाध्यक्ष नारायणकाजी श्रेष्ठ र उपाध्यक्ष पम्फा भुसाल उपस्थित थिए ।
बैठकमा नेपाली कांग्रेसका सभापति शेरबहादुर देउवा, नेता कृष्ण सिटौला, एमालेका अध्यक्ष एवं प्रधानमन्त्री केपी शर्मा ओली, वरिष्ठ उपाध्यक्ष ईश्वर पोखरेल सहभागी थिए ।
जनमत पाटीका अध्यक्ष सिके राउत, राष्ट्रिय जनमोर्चाका अध्यक्ष चित्रहादुर केसी, लोकतान्त्रिक समाजवादीका अध्यक्ष महन्थ ठाकुर, जनता समाजवादी पार्टी नेपालका अध्यक्ष उपेन्द्र यादव, जनता समाजवादी पार्टीका अध्यक्ष अशोक राइ, नेपाल समाजवादी पार्टी (नयाँ शक्ति)का अध्यक्ष डा.बाबुराम भट्टराई लगायत उपस्थित भए ।
बैठकमा राप्रपालाई भने बोलाइएन । स्रोतका अनुसार गणतन्त्र पक्षधरको बैठक भएकाले राप्रपालाई नबोलाइएको हो । तर, बैठकमा प्रचण्ड र माधव नेपाल उपस्थित नहुनुलाई अर्थपूर्ण रुपमा हेरिएको छ ।
व्यवस्थाविरोधी गतिविधिका जिम्मेवार ज्ञानेन्द्र
बैठकले पछिल्लो समय राजतन्त्रका पक्षमा भएका गतिविधिहरूको मुख्य जिम्मेवार पूर्वराजा ज्ञानेन्द्र शाह नै भएको निष्कर्ष निकालेको छ । गणतन्त्र पक्षधरहरूको बैठकबाट सबै दलहरू पूर्वराजा शाहकै कारण यस्ता गतिविधि बढेको निष्कर्षमा पुगेको गृहमन्त्री रमेश लेखकले जानकारी दिए ।
उनले भने, ‘संघीय लोकतन्त्रिक शासन व्यवस्था उल्ट्याउने, नेपालको संविधानलाई नै समाप्त गर्ने जति गतिविधि भएका छन् । यो सबैको मुख्य जिम्मेवार पूर्वराजा ज्ञानेन्द्र नै हुन् भन्नेमा सबै दलहरूको एकमत रहेको छ ।’
साथै, यस्ता गतिविधि सैह्य नहुने पनि दलहरूको निष्कर्ष रहेको गृहमन्त्री लेखकले बताए । ‘गणतन्त्र र संविधानका विरोधमा गरिने कुनै गतिविधि सैह्य हुने छैन’ उनले भनेका छन् ।
गत चैत १५ गते तीनकुनेमा भएको घटनालाई दलहरूले ‘अमानवीय, बर्बरतापूर्वक, निर्मम प्रकृतिको’ भएको बताएका छन् । ‘तीनकुनेमा भएको अमानवीय, बर्बरतापूर्वक, निर्मम प्रकृतिको कुनै पनि घटनाक्रम भएका छन् । ती गम्भीर छन्’ उनले भने ।
