काठमाडौं । शुक्रबार राजसंस्था फर्काउने अभियानसहित पूर्वराजा ज्ञानेन्द्र शाहका समर्थकले गरेको प्रदर्शन अराजक बन्यो । काठमाडौंको तीनकुने क्षेत्रमा भएको प्रदर्शन अराजक मात्र बनेन, दुईजनाले ज्यान गुमाए भने करोडौँको क्षति भयो । उक्त घटनामा संलग्न भएको आरोपमा प्रहरीले हालसम्म ४१ जनालाई पक्राउ गरी अनुसन्धान थालेको छ ।
काठमाडौं जिल्ला अदालतकी न्यायाधीश तारादेवी महर्जनको इजलासले ४१ जनालाई पाँच दिन हिरासतमा राखेर अनुसन्धान गर्न अनुमति दिएको हो । चैत १५ गतेदेखि नै मानिसहरू पक्राउ परेकाले त्यस दिनदेखि गन्ती गरी ५ दिनको अनुमति दिइएको हो ।
काठमाडौं जिल्ला प्रहरी परिसर काठमाडौंले ४१ जनाविरूद्ध दुइटा अनुसन्धान प्रतिवेदन तयार गरी अनुसन्धान अघि बढाउने भएको छ ।
राष्ट्रिय प्रजातन्त्र पार्टी (राप्रपा)का वरिष्ठ उपाध्यक्ष रवीन्द्र मिश्र, सांसद धवल शमशेर राणासहित ११ जनालाई राजद्रोह र संगठित अपराधमा अनुसन्धान गर्ने भएको हो । त्यस्तै अन्य ३० जनालाई आपराधिक उपद्रव र संगठित अपराधमा अनुसन्धान गर्न म्याद लिएको हो ।
यसरी म्याद लिँदा न्यायाधीश महर्जनले मिश्र र राणाको स्वास्थ्य अवस्थालाई ख्यालमा राखेर उपचारको व्यवस्था मिलाउन आदेश दिएकी छन् ।
मिश्र र राणासँगै प्रहरीले आफूलाई धर्मगुरू बताउने पुष्कर खतिवडाविरूद्ध पनि राजद्रोहको मुद्दा लगाउने तयारी गरेको छ ।
दुर्गा प्रसाईंका सहयोगी मनिन्द्र राजभण्डारी र गोपाल मल्ल पनि पक्राउ परेका छन् । राजभण्डारी रोयल टास्क फोर्स आरटिएफका कमान्डरसमेत तोकिएका थिए । मल्ल भने सशस्त्र प्रहरीको हतियार खोस्ने व्यक्ति हुन् ।
त्यस्तै प्रहरीले भक्तपुर बस्ने ४२ वर्षीय सन्तोष चौधरी, ५१ वर्षीय रामकुमार धिमाल, ४१ वर्षीय पशुपति खड्का, ४२ वर्षीय हरिहर चौलागाईं र ३९ वर्षीय विष्णु पराजुलीलाई पनि पक्राउ गरेको छ ।
उनीहरू धेरै उग्र भएर तोडफोड र आगजनीमा लागेका व्यक्तिहरू भएको एसपी बोहराले बताए । बाँकी ३० जना पनि विभिन्न सिसिटिभी फुटेज, भिडिओ, फोटोमा देखिएका व्यक्तिहरूलाई पक्राउ गरेको एसपी बोहराले बताए ।
पक्राउ पर्नेहरूको सूची :
