काठमाडौं । नेपाली कांग्रेसका महामन्त्री विश्वप्रकाश शर्माले राजावादीको हिंसात्मक आन्दोलनमा दुई युवाले ज्यान गुमाउँदा पनि पूर्वराजा ज्ञानेन्द्र शाहले दुःखसम्म व्यक्त नगरेको बताएका छन् ।
आज बसेको प्रतिनिधिसभा बैठकको विशेष समयमा बोल्दै सांसद शर्माले तिनकुने घटनाबाट धेरैलाई दुख्दा पनि निर्मल निवासलाई नदुखेको भन्दै यस्तै राजा चाहिएको भन्दै प्रश्न गरेका हुन् ।
‘शान्तिपूर्ण भनिएको आन्दोलनको नाममा दुईजना होनहार युवाले ज्यान गुमाए । तर निर्मल निवासलाई दुखेन,’ उनले प्रश्न गर्दै भने, ‘नागरिक मर्दा धेरैलाई दुख्यो तर, निर्मल निवासलाई दुखेन । सभामुख महोदय म सोध्न चाहन्छु –तीनकुनेलाई दुख्दा, हृदय नदुख्ने कस्तो राजा चाहिएको हो ?’
राजा संवैधानिक भएर बस्न नमानेपछि मुलुकमा गणतन्त्र स्थापना भएको भन्दै शर्माले राजावादीको आन्दोलनमा लागेकाहरूलाई इतिहासको ख्याल गर्न आग्रह गरे ।
