काठमाडौँ । राष्ट्रिय स्वतन्त्र पार्टी (रास्वपा) को केन्द्रीय समिति बैठक जारी छ। अपराह्न ४ बजेदेखि बैठक सुरु भएको पार्टी कार्यवाहक प्रवक्ता मनीष झाले जानकारी दिए।
पार्टी सभापति रवि लामिछानेले पार्टी जिम्मेवारीमा फर्किएपछि आज पहिलोपटक केन्द्रीय समिति बैठकमा सहभागी भएका छन् ।
गत कात्तिक २ गते सहकारी ठगी, संगठित अपराध र सम्पत्ति शुद्धीकरणसमेत अभियोगमा पक्राउ परेका थिए । त्यसपछि रास्वपा कार्यवाहक सभापति डीपी अर्यालले नेतृत्व गरिरहेका थिए । पहिलो बैठकमा सभापतिले धन्यवाद दिनेलगायत कार्यसूची छ।
आजै अर्को केन्द्रीय समिति बैठक बस्दैछ उक्त बैठकले पार्टी र संसद्मा पार्टीका तर्फबाट भइरहेका गतिविधिबारे लामिछानले ब्रिफिङ लिनेछन् ।
त्यस्तै लिडरसिप एकेडेमीको फ्लो चार्ट र जनयात्रा कार्यक्रमबारे छलफल हुने झाको भनाइ छ। आजको बैठकले पार्टीको राजनीतिक प्रतिवेदनमा आधारित देशव्यापी जागरण र बहसबारे छलफल गर्नेछ।
अधिवेशन/महाधिवेशन कार्यतालिकाबारे छलफल हुने रास्वपाका नेताहरूले बताएका छन्। रास्वपाले आगामी वैशाख २५, २६ र २७ गते पहिलो महाधिवेशन गर्ने भनेर तयारी गरे पनि कार्यतालिकाअनुसार जिल्ला भेला, वडा र पालिका अधिवेशन हुन सकेको छैन। त्यसैले तोकिएको समयमा महाधिवेशन हुने सम्भावना टरेको बताइएको छ। आजको बैठकले नया मिति प्रस्ताव गरेर त्यसमाथि छलफल सुरु गर्ने भनिएको छ। यीबाहेक अन्य समसामयिक राजनीतिक घटनाक्रमबारे पनि छलफल हुने बताइएको छ।
