काठमाडौं । सत्तारुढ नेकपा एमालेले मोटरसाइकल र्याली निकालेको छ । काठमाडौंको तीनकुनेबाट एमालेले राजावादी अभियानविरुद्ध र्याली निकालेको हो ।
र्यालीमा सहभागी हुन एमाले नेताहरू राजन भट्टराई, विष्णु रिजाल, क्षितिज थेवेलगायत पनि पुगेका थिए । नेताहरूले बिना हेलमेट फोटो सेसन गरेका छन् ।
‘लोकतन्त्रको विकल्प, केवल उन्नत लोकतन्त्र’ नारासहित निकालिएको र्यालीमा एमाले नेताहरूले बिना हेलमेट पोस्ट गरेको तस्वीरहरूबाट जाने सन्देशबारे याद नगरेको देखिन्छ ।
एमाले नेता विष्णु रिजालले ‘प्रतिगामी हर्कतका विरुद्ध मोटरसाइकल र्याली’ भन्दै सामाजिक सञ्जालमा पोस्ट गरेका तस्वीरहरूमा हेलमेल लगाइएको छैन ।
उनको स्टाटसमा प्रतिक्रिया दिँदै एमाले धादिङकी सचिव राधिका सापकोटाले लेखेकी छन्, ‘हेलमेट लगाऔं है कमरेड !’ नेता रिजाललाई यस्तो सुझाव अरु धेरै नेता÷कार्यकर्ताले पनि दिएका छन् ।
नेताहरू सुरक्षाका आधारभूत मापदण्डविपरीत हेलमेटबिनाको दृश्यले सुरक्षा र नियम पालनासम्बन्धी उनीहरूको सचेतनाप्रति प्रश्न उठाएको छ ।
सडकमा ट्राफिक नियम उल्लङ्घन गर्ने सर्वसाधारणलाई प्रहरीले सजाय दिने तर नेताहरूले खुलेआम नियम उल्लंघन गर्दा कुनै प्रतिक्रिया नआउने अभ्यासप्रति पनि सामाजिक सञ्जाल प्रयोगकर्ताहरूले प्रश्न उठाएका छन् ।
कतिपय प्रयोगकर्ताले ‘सुरक्षा नियम सर्वसाधारणका लागि मात्र लागू हुन्छ ?’ भन्दै व्यङ्ग्य गरेका छन् ।
र्यालीको मुख्य सन्देश ‘लोकतन्त्रको विकल्प, केवल उन्नत लोकतन्त्र’ भए पनि नेताहरूको कार्यले विधिको शासनको मूल्यमान्यतालाई कमजोर पारेको केहीको प्रतिक्रिया छ ।
एमालेले ‘लोकतन्त्रको विकल्प, केवल उन्नत लोकतन्त्र’ नारासहित सोमबार देशव्यापी रुपमा र्याली निकालेको हो । पार्टीको अभियान अन्तर्गत एमालेले आज यो कार्यक्रम गरेका हुन् ।
नेकपा एमालेको मोटरसाइकल र्यालीका कारण तीनकुने क्षेत्रको ट्राफिक अस्तव्यस्त बनेको छ । एमालेको भातृसंस्था युवा संघको अगुवाईमा राजावादीरूको हिंसाविरुद्ध मोटरसाइकल र्याली आयोजना गरिएको एमालेले जनाएको छ । मोटरसाइकल र्यालीबाट सिनामंगल–कोटेश्वर चल्ने रिङरोड क्षेत्र र कोटेश्वर–बानेश्वर चल्ने सडक अस्तव्यस्त बनेको छ ।
एमाले महासचिव शंकर पोखरेलले राजावादी प्रदर्शनका विरुद्ध देशभरि जागरणसभा र मोटरसाइकल र्याली गरेको जानकारी दिएको छ ।
महासचिव पोखरेलले गणतन्त्र जिन्दावाद, प्रतिगमन मुर्दावाद, हिंसा, हत्या र लुटपाट मुर्दावाद, जन्मसिद्ध श्रेष्ठता अस्वीकार छैन, दास र रैती बन्न मन्जुर छैनलगायत नारा सार्वजनिक गरेका थिए ।
