काठमाडौं । दोर्दी खोला जलविद्युत लिमिटेडले चैत १९ गतेदेखि १:१ अनुपातमा हकप्रद सेयर जारी गरेको छ। यस योजनाअन्तर्गत हाल कायम चुक्ता पुँजीको १०० प्रतिशत बराबरको हकप्रद सेयर निष्कासन गरिएको हो।
कम्पनीले कुल १ अर्ब ५ करोड ४२ लाख ६० हजार ४०० रुपैयाँ बराबरको हकप्रद सेयर जारी गर्दै छ। यस अन्तर्गत १०० रुपैयाँ अङ्कित मूल्यका १ करोड ५ लाख ४२ हजार ६०४ कित्ता सेयर बिक्री खुला गरिएको छ।
हकप्रद सेयर खरिद गर्न कम्पनीले फागुन १५ गते बुक क्लोज गरिसकेकोले फागुन १३ गतेसम्म नेप्सेमा कारोबार भई कायम भएका सेयरधनीहरू मात्र आवेदन दिन योग्य हुनेछन्। आवेदन दिने अन्तिम मिति २०८२ वैशाख ८ गतेसम्म तोकिएको छ।
इक्रा नेपालले दोर्दी खोला जलविद्युत लिमिटेडलाई इक्रा एपी इस्यूअर रेटिङ्ग बी प्लस प्रदान गरेको छ, जसले वित्तीय दायित्व बहन गर्ने क्षमतामा उच्च जोखिम रहेको सङ्केत गर्दछ।
कम्पनीको हकप्रद सेयर निष्कासन तथा बिक्री प्रबन्धक सानिमा क्यापिटल लिमिटेड रहेको छ। साथै, सानिमा बैङ्कका विराटनगर, वीरगञ्ज, पोखरा, रुपन्देही, बाँके, सुर्खेत, धनगढी र लमजुङ शाखा कार्यालयहरूबाट पनि आवेदन दिन सकिनेछ।
नेपाल धितोपत्र बोर्डबाट अनुमति लिई आस्वा सेवामा सहभागी बैङ्क तथा वित्तीय संस्था र तिनका तोकिएका शाखा कार्यालयहरूबाट समेत आवेदन दिन सकिनेछ। साथै, सिडिएस एण्ड क्लियरिङ लिमिटेडद्वारा सञ्चालित ‘मेरो सेयर’ अनलाइन प्रणाली प्रयोग गरी सि-आस्वा प्रणालीमार्फत पनि आवेदन दिन सकिनेछ।
