काठमाडौं । प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीच भेटवार्ता हुने भएको छ । थाइल्याण्ड भ्रमणमा रहेका प्रधानमन्त्री ओली र भारतीय प्रधानमन्त्री मोदीबीच छैटौं बिमस्टेक शिखर सम्मेलनका दौरान साइडलाइन वार्ता हुने भएको हो ।
बैंककमा रहेका नेपाली अधिकारीहरूका अनुसार शुक्रबार स्थानीय समय अनुसार दिउँसो ४ बजे दुई प्रधानमन्त्रीबीच आधा घण्टा भेटवार्ता गर्ने कार्यक्रम तय भएको छ ।
प्रधानमन्त्री ओलीको लामो समयदेखि प्रतिक्षा गरिएको भारतको औपचारिक द्विपक्षीय भ्रमणको लागि यो भेटवार्ताले मार्ग प्रशस्त गर्ने विश्वास लिइएको छ । ओली प्रधानमन्त्री भएपछि न त उनको भारत भ्रमण सुनिश्चित भएको छ न त भारतीय प्रधानमन्त्रीको नेपाल भ्रमण नै तय भएको छ ।
गत भदौमा भारतीय प्रधानमन्त्री मोदीसँगको भेटमा परराष्ट्रमन्त्री आरजु राणा देउवाले भारतीय प्रधानमन्त्रीलाई नेपाल भ्रमणको निम्तो दिएकी थिइन् । तर ओलीको भारत भ्रमण र मोदीको नेपाल भ्रमण दुवै भएको छैन ।
भारतीय प्रधानमन्त्री मोदी बाहेक प्रधानमन्त्री ओलीले शिखर सम्मेलनको क्रममा अन्य बिमस्टेक नेताहरूसँग पनि साइडलाइन भेटघाट गर्नेछन् । तर भारतीय प्रधानमन्त्री मोदीसँगको भेट बहुप्रतीक्षित मानिएको छ ।
