काठमाडौं । काठमाडौं महानगरपालिकाका प्रमुख प्रशासकीय अधिकृत सरोज गुरागाईं कार्यकक्षमा प्रवेश गरेका छन् । ढोकामा लगाएको ताला नगर प्रहरीले फोडेपछि उनलाई कार्यकक्षमा प्रवेश गराइएको हो ।
कर्मचारी र जनप्रतिनिधिको सहयोगमा कार्यकक्ष प्रवेश गरेसँगै गुरागाईंले जिम्मेवारी सम्हालेका छन् । त्यसअघि आजै मेयर अनुपस्थित रहेको कार्यपालिका बैठक बसेर ताला फोडेर गुरागाईंलाई कार्यकक्षमा प्रवेश गराउने निर्णय गरिएको थियो ।
प्रमुख प्रशासकीय अधिकृत गुरागाईंलाई कार्यकक्षमा प्रवेश गराउने बैठकको नेतृत्व उपमेयर सुनीता डंगोलले गरेकी थिइन् ।
गुरागाईं कार्यालय जाने चर्चाबीच आज मेयर बालेनको निर्देशनमा नगर प्रहरीले उनको कार्यकक्षमा ताला लगाएको थियो ।
काठमाडौं टावर १९ तलाको बनाउन स्वीकृति दिएको पाइएपछि गुरागाईंलाई बाालेनले पुस १४ गतेदेखि निलम्बन गरेका थिए । तर, संघीय मामिला तथा सामान्य प्रशासन मन्त्रालयले गुरागाईंलाई नै काम गर्ने वातावरण मिलाउन निर्देशन दिएपछि उनी महानगरमा काम गर्द आएका हुन्।
