काठमाडौं । प्रहरीले एम्बुलेन्समा लुकाएर ल्याएको लागुऔषधसहित ४ जना भारतीय नागरिकलाई पक्राउ गरेको छ । शुक्रबार राति २ बजेतिर ललितपुर बागमती गाउँपालिका-३ छपेली भट्टेडाँडामा भारतीय नम्बर प्लेट बिआर ०५ पिए ०४२१ नम्बरको एम्बुलेन्स चेक गर्दा उनीहरु लागुऔषधसहित पक्राउ परेका हुन् ।
प्रहरीका अनुसार पक्राउ पर्नेमा २० वर्षीय भारतीय नागरिक समिर आलम, ३३ वर्षका मुन्ना अन्सारी, ४५ वर्षकी नोर्जान खातुन छन् । जिल्ला प्रहरी परिसर ललितपुरले पत्रकार सम्मेलन गरी सो घटनाबारे जानकारी दिएको हो ।
एम्बुलेन्स चालक मोहम्मद उमर भने एम्बुलेन्सको चाबी लिएर फरार भएपनि शनिबार पक्राउ परेको एसएसपी श्यामकृष्ण अधिकारीले बताए । बयानका क्रममा उनीहरूले बिरामी भएको नाटक गरी उक्त लागुऔषध काठमाडौं भित्र्याउन खोजेको बताएका छन् । भारी मात्राको लागुऔषध उनखीहरुले नेपाली व्यक्तिको लागि ल्याएको बताएका छन् ।
उक्त स्थानमा प्रहरी चौकी भट्टेडाँडाबाट प्रहरी सहायक निरीक्षक श्रीराम सिंहको कमाण्डमा खटिएको २ जना प्रहरी टोलीले एम्बुलेन्सभित्रबाट लागुऔषध ट्रामाडोल ९३ हजार ८०० क्याप्सुल बरामद गरेको हो ।
