काठमाडौं । सञ्चार तथा सूचना प्रविधिमन्त्री पृथ्वीसुब्बा गुरुङले आम सहमतिका आधारमा संविधान संशोधन हुने बताएका छन् । शुक्रवार रुपन्देहीको भैरहवास्थित गौतमबुद्ध विमानस्थलमा पत्रकारहरूसँग कुरा गर्दै गुरुङले संविधान संशोधन सबैको दायित्व र अपनत्वको विषय भएकाले सबैको सहमतिमा संशोधन हुने बताएका हुन् ।
मन्त्री गुरुङले दुईतिहाई दम्भमा संविधान संशोधन गर्न खोजेको भन्ने कुरामा कुनै सत्यता नरहेको उल्लेख गरे । उनले कांग्रेस–एमालेबिच कार्यदल बनाएर करिब १० वर्षको अवधिमा संविधान कार्यान्वयन गर्दाको सबल र दुर्बल पक्षको समीक्षा गर्दै विषयहरू पहिल्याउने कार्य भइरहेको जानकारी दिए ।
गुरुङले संशोधनका लागि पहिचान भएका साझा विषयहरूलाई साझा एजेण्डा बनाउँदै प्रतिपक्षी दलहरूसँग छलफल हुने उल्लेख गरे ।
