हेटौंडा, ६ भदौ । कोरोना संक्रमणका कारण वाग्मती प्रदेशमा मात्रै हालसम्म २९ जनाको मृत्यु भइसकेको छ । मकवानपुरको हेटौँडामा एक महिला र दुई पुुुरुषसहित तीन जनाको उक्त संक्रमणबाट मृत्युु भइसकेको बताइएको छ ।
मकवानपुरमा हालसम्म संक्रमितको संख्या २६० पुगेको छ । प्रदेशको सामाजिक विकास मन्त्रालयका अनुसार वाग्मती प्रदेशमा हालसम्म चार हजार ३४ जनामा कोरोना भाइरसको संक्रमण देखापरेको छ ।
प्रदेशमा ७३४ जना कोरोना संक्रमित उपचारपश्चात् घर फर्केका छन् । सङ्क्रमितमध्ये धेरैको आइसोलेसनमा उपचार भइरहेको छ । मन्त्रालयबाट प्राप्त जानकारीअनुुसार कोरोना सङ्क्रमण जनस्तरमा फैलिन थालेपछि प्रदेश सरकारले कोरोना जाँच गर्ने दायरा बढाएको छ । प्रदेशका १३ जिल्लामध्ये सबैभन्दा बढी काठमाडौँमा सङ्क्रमित फेला परेकाले कडाइ गरिएको छ ।
यसैबीच कोरोना सङ्क्रमण नियन्त्रणका लागि हेटौंडामा जारी गरिएको निषेधाज्ञामा कडाइ गरिएको छ ।
निषेधाज्ञाका कारण हेटौँडालगायत आसपास बजार पूर्ण रुपमा बन्द रहेको छ । मकवानपुरका प्रमुख जिल्ला अधिकारी दीपकराज नेपालले कोरोना जनसमुदायमा फैलिन थालेपछि यही भदौ ९ गतेसम्मका लागि निषेधाज्ञा जारी गरिएको बताए ।
