मनाङ, २१ भदौं । कोभिड–१९ का संक्रमित देशैभर बढ्दै गएको छ । कोभिड संक्रमित निको हुने क्रम पनि बढ्दै गएको छ । लामो समयको अन्तरालमा मनाङमा संक्रमित थपिएसँगै हाल दुई जना आइसोलेसनमा छन् ।
संक्रमितहरुले उच्च मनोबल र सचेतना अपनाएपछि छिट्टै निको पनि भएका छन् । शुक्रबार तीन संक्रमित निको भएसँगै जिल्लामा निको हुनेको संख्या चार पुगेको स्वास्थ्य कार्यालय मनाङका प्रमुख बद्रीराज आचार्यले जानकारी दिए । उनका अनुसार हालसम्म जिल्लामा छ संक्रमितमध्ये चार जना निको भइसकेका छन् ।
‘निको भएका सङ्क्रमितलाई सम्मानपूर्वक आइसोलेसनबाट बिदाइ समेत गरिसकिएको छ, अब आइसोलेसनमा शुक्रबार थपिएका एक जना र त्यसअघिका एक जना पुरुष गरी दुई जना रहेका छन्, उनीहरु पनि छिट्टै निको हुनेछन्, ‘शुक्रबार थपिएका संक्रमितको कन्ट्याक्ट ट्रेसिङबाट भएको हो ।’
त्रिहत्तर जनाको पिसीआर परीक्षण गरिएको मध्ये गोरखाको आरुघाट–७ घर भई हाल मनाङमा कार्यरत एक प्रहरीमा कोरोना संक्रमण पुष्टि भएपछि अहिले जिल्लामा दुई संक्रमित आइसोलेसनमा रहेको उनले बताए । उनीहरूको स्वास्थ्य अवस्था भने सामान्य रहेको आचार्यको भनाइ छ ।
यही भदौ १६ गते ७३ जनाको स्वाब नमूना संकलन गरिएकामा ७२ जनाको भने रिपोर्ट नेगेटिभ आएको स्वास्थ्य कार्यालय मनाङले जनाएको छ । हालसम्म १९२ जनाको पिसीआर परीक्षण गरिएकोमा ६ जनामा संक्रमण पुष्टि भएको थियो । शुक्रबार आइसोलेसनमा रहेका संक्रमितको पुनः परीक्षणमा रिपोर्ट नेगेटिभ आएपछि घर पठाइएको आचार्यले बताए ।
मनाङमा कोरोना संक्रमण मुक्त भइसकेपछि पुनः संक्रमण देखिएको हो । जिल्लामा संक्रमण देखिन थालेपछि स्थानीयवासी भने त्रसित बनेका छन् । मनाङमा धेरैजसो शिक्षक, कामदार, कर्मचारी बाहिरी जिल्लाबाट आउने हुँदा स्रक्रमण देखिएको हो । हालसम्म स्थानीयवासीमा भने संक्रमण देखिएको छैन ।
