काठमाडौं, १८ माघ ।
ट्रायल परीक्षामा फेल भएका तथा परीक्षामा उपस्थित नै नभएकालाई घुस लिएर सवारी चालक अनुमति पत्र (लाइसेन्स) वितरण गर्ने यातायात कार्यालयका ८ जना कर्मचारीविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ।
यातायात कार्यालय एकान्तकुनामा कार्यरत शाखा अधिकृत भक्तबहादुर विष्ट, शाखा अधिकृत विष्णुप्रसाद सुवेदी¸ कम्प्युटर अपरेटर जयनारायण चौधरी र सचिन कुमार सिंह, यातायात व्यवस्था सवारी चालक अनुमति पत्र कार्यालय ठुलोर्भयाङका कम्प्युटर अधिकृत विजेन्द्र राज जोशीविरुद्ध मुद्दा दायर भएको छ । त्यस्तै तत्कालीन एकान्तकुनामै कार्यरत तथा हाल कम्पनी रजिष्ट्रारको कार्यालय त्रिपुरेश्वरका कम्प्युटर अपरेटर अमित कुमार साह¸ हाल मेची यातायात व्यवस्था कार्यालयका कम्प्युटर अपरेटर विजयराम बनमाला र हाल प्रदेश नं२ आर्थिक मामिला तथा योजना मन्त्रालयका कम्प्युटर अपरेटर मदन कुमार साह गरी ८ जना विरुद्ध भ्रष्टाचार मुद्दा दायर गरिएको हो।
यातायात व्यवस्था सवारी चालक अनुमतिपत्र कार्यालय प्रदेश नं ३ बागमती ललितपुरबाट परीक्षामा फेल भएका एवम् ट्रायल परीक्षा नदिएकै अवस्थामा समेत सवारी चालक अनुमति पत्र जारी गर्ने गरेको सूचना आएपछि अख्तियारले अनुसन्धान सुरु गरेको थियो।
उनीहरूले गत साउन १६ गतेदेखि ओज २४ गतेसम्म एकान्तकुना कार्यालयबाट लिएका विभिन्न वर्गका सवारी चालक अनुमति पत्रहरूको प्रयोगात्मक परीक्षामा फेल र अनुपस्थित र चेकलिष्टमा नाम समावेश नभएकाहरु समेत गरी ६ सय २९ वटा लाइसेन्स जारी गरेको अनुसन्धानबाट खुलेको छ। प्रतिलाइन्सेन्स ५० हजार रुपैयाँसम्म उनीहरुले लिएका थिए ।
